एजेन्सी – दुई पटकको च्याम्पियन वेस्टइन्डिज आइसिसी टि२० विश्वकप २०२२ मा समूह चरणबाटै बाहिरिने खतरामा छ । वेस्टइन्डिजले दोस्रो खेलमा आज दिउँसो जिम्बावेसँग खेल्दैछ ।

जिम्बावे र वेस्टइन्डिजबीचको खेल दिउँसो १ : ४५ मा होबार्टमा सुरु हुनेछ । वेस्टइन्डिज पहिलो खेलमा स्कटल्यान्डसँग ४२ रनले पराजित भएको थियो । उक्त हारले वेस्टइन्डिज सुपर १२ मा पुग्न बाँकी दुबै खेल जित्नुपर्छ । वेस्टइन्डिजले शुक्रबार आयरल्यान्डसँग खेल्नेछ । जिम्बावे यस खेलमा विजयी हुँदा सुपर १२ को सम्भावना मजबुत बन्नेछ ।

वेस्टइन्डिजको लागि गैर जिम्मेवार ब्याटिङ प्रमुख समस्या हो । टि२० क्रिकेटका विश्व स्टार ब्याटर भएपनि प्रदर्शन लगातार खराब रहँदै आएको छ । एसोसियट टोली स्कटल्यान्डले प्रस्तुत गरेको १ सय ६१ रनको विजयी लक्ष्य पछ्याएको वेस्टइन्डिज १ सय १८ रनमा अल आउट भयो ।

स्कटल्यान्डविरुद्ध एविन लेविस, निकोलस पुरन, रोभम्यान पावेल, जेसन होल्डर, ब्रेन्डन किंग र काइल मेयर्स जस्ता विश्व स्टार ब्याटर टोलीमा छन् । होल्डरले ३८ रन बनाउँदा अन्यले राम्रो प्रदर्शन गर्न सकेनन् । प्रमुख दुई विष्फोटक ब्याटर पावेल ५ र पुरन ४ रनमा आउट भए ।

वेस्टइन्डिजको लागि वर्तमान समयमा गैरजिम्मेवार ठूलो समस्या हो । नाम अनुसार प्रदर्शन गर्ने हो भने वेस्टइन्डिज उपाधिको बलियो दाबेदार हो । बलरमा अल्जारी जोशेफ, ओबेद म्याककोय र शेल्डन कटरेल छन् । स्पिनर अकिल हुसैन, ओडेन स्मिथ र अल्जारी जोशेफ पनि त्यतिनै विष्फोटक ब्याटिङको क्षमता राख्छन् ।

म्याककोय बाहेक अन्य सबै खेलाडी ब्याटिङमा खेल जिताउन सक्ने खुबी छ । १० नम्बर सम्म ब्याटिङ भएको वेस्टइन्डिजको ठूलो समस्या नै गैर जिम्मेवार हो । बाँकी दुई खेलमा त्यसलाई सुधार गर्नुपर्छ । वेस्टइन्डिजले आफ्नो क्षमता अनुसार खेल्दा भने कुनै कठिन देखिदैन । आजको खेलमा वेस्टइन्डिजले ब्याटिङमा उत्कृष्ट प्रदर्शन गर्नुपर्ने हुन्छ ।

यता जिम्बावेले पहिलो खेलमा आयरल्यान्डलाई ३१ रनले हराएको थियो । सिकन्दर राजाले आफ्नो उच्च लयलाई निरन्तरता दिँदै ४८ बलमा ५ छक्का र ५ चौकासहित ८२ रनको इनिङ खेलेका थिए । राजाको लय रोक्न नै वेस्टइन्डिजका बलरलाई चुनौती हुनेछ । रयान बर्लले पनि सानदार प्रदर्शन गर्दै आएका छन् । उनी फिनिसर हुन् । मध्यक्रमका ब्याटर वेस्ली मेधर्वे भरपर्दा ब्याटर हुन् ।

तीव्र गतिका बलर ब्लेसिङ मुर्जाबानी बलिङका प्रमुख हतियार हुन् । आजको पहिलो खेलमा स्कटल्यान्ड र आयरल्यान्डबीच प्रतिस्पर्धा हुँदैछ । खेल विहान ९ : ४५ मा सुरु हुनेछ ।

आयरल्यान्डलाई यो खेल जित्नै पर्ने दबाब छ । वेस्टइन्डिजलाई स्तब्ध पारेको स्कटल्यान्ड यस खेलमा विजयी हुँदा सुपर १२ को सम्भावना उच्च हुन्छ ।

शीर्ष दुई दुई टोली सुपर १२ मा पुग्नेछन् । सुपर १२ को समूह ए मा इंग्ल्यान्ड, अष्ट्रेलिया, न्युजिल्यान्ड, अफगानिस्तान, समूह ए को विजेता र समूह बी को उपविजेता रहनेछन् । सुपर १२ को समूह बी मा भारत, पाकिस्तान, दक्षिण अफ्रिका, बंगलादेश समूह बी को विजेता र समूह ए को उपविजेता हुनेछन् ।

अंक तालिका

समूह ए मा नेदरल्यान्ड्स २ खेलमा ४ अंकका साथ शीर्ष स्थानमा छ । नामिबिया २ खेलमा १ मा जित र १ मा हार सहित २ अंक जोड्दै दोस्रो स्थानमा छ । नामिबियाको नेटरनरेट प्लस १.२७७ छ ।

श्रीलंका २ खेलमा १ मा जित र १ मा हार सहित तेस्रो स्थानमा छ । श्रीलंकाको नेटरनरेट प्लस ०.६०० छ । युएई पुछारमा छ ।

समूह बी मा स्कटल्यान्ड १ खेलमा १ मा जित र १ मा हार सहित शीर्ष स्थानमा छ । जिम्बावे १ खेलमा २ अंकका साथ दोस्रो स्थानमा छ । स्कटल्यान्डको नेटरनरेट प्लस २.१०० छ । जिम्बावेको प्लस १. ५५० छ । आयरल्यान्ड र वेस्टइन्डिज पुछारमा छन् ।