पोखरा (हाम्रो खेलकुद) – अलराउन्डर विपिन खत्रीले प्रधानमन्त्री एकदिवसिय राष्ट्रिय प्रतियोगिता अन्तर्गत गण्डकी प्रदेश छनोटमा कास्कीबाट नवलपुरविरुद्ध सानदार शतक हानेका छन् । उनको सानदार शतकमा कास्की १ सय ४२ रनको फराकिलो अन्तरले विजयी भयो ।

पोखरा रंगशालामा टस हारेर पहिला ब्याटिङ थालेको कास्की ५० ओभरमा २ सय ३३ रनमा अल आउट भयो । कास्कीको लागि विपिन खत्रीले ८६ बलमा १३ चौका र ४ छक्कासहित १ सय १७ रनको अविजित सानदार शतकीय इनिङ खेले ।

ओपनर मुस्कान थापा मगर १० र अर्जुन कुमाल ३१ रनमा आउट भए । अर्जुनले ५६ बलमा ७ चौका हाने । अभिषेक थापा २२ र पौडेल १२ रनमा आउट भए । नवलपुरका विशाल पौडेल र रिजन काफ्लेले दुई दुई विकेट लिए । जितको लागि २ सय ३४ रनको विजयी लक्ष्य पछ्याएको नवलपुर २३.२ ओभरमा ९१ रनमा अल आउट भयो ।

गोविन्द विक १२, दीपक डुम्रे १८, रिजन काफ्ले १६, विशाल पौडेल ११ र प्रिन्स खनाल १२ रनमा आउट भए । कास्कीका कृष्ण पौडेलले ५.२ ओभरमा ३१ रन खर्चेर ३ विकेट लिए ।

अमृत गुरुङ, विपिन खत्री र सुवास भण्डारीले दुई दुई विकेट लिए । प्रधानमन्त्री कप कार्तिक १२ देखि २६ सम्म काठमाडौंमा हुनेछ । त्यसको लागि खेलाडी छनोट गर्न सबै प्रदेशले छनोट प्रतियोगिता आयोजना गरेका छन् ।