काठमाडौं (हाम्रो खेलकुद) –नेपाल क्रिकेट संघ (क्यान) ले पाँचौं संस्करणको प्रधानमन्त्री कप एकदिवसिय राष्ट्रिय प्रतियोगिता विजेता टोलीलाई १० लाख रुपैयाँ दिने भएको छ । प्रधानमन्त्री कप कार्तिक १३ देखि २६ सम्म काठमाडौंमा सुरु हुँदैछ ।

क्यानका कोषाध्यक्ष रोशन सिंहका अनुसार प्रधानमन्त्री कपको विजेताले १० लाख र उपविजेता टोलीले ५ लाख पाउनेछन् । त्यस्तै प्रतियोगिता सर्वोत्कृष्ट खेलाडीले ५० हजार रुपैयाँ पाउने भएका छन् । प्रतियोगिता उत्कृष्ट ब्याटर र बलरलो समान २० हजार पाउनेछन् । प्रतियोगिता उदीयमान खेलाडीले १० हजार प्राप्त गर्नेछन् ।

सिंहका अनुसार क्यानले खेलाडीको यातयात, खाना, बस्न सबै सेवालाई छाडेर म्याच फी १५ सय दिने भएको छ । ‘हामीले म्याच फी १५ सय दिने छौं । प्रतियोगिताको अनुमाति कुल बजेत १ करोड ४७ लाख छ । राष्ट्रिय खेलकुद परिषद् (राखेप) ले ६० लाख र अन्य क्यानले आन्तरिक श्रोतबाट पूरा गर्नेछ’, सिंहले हाम्रो खेलकुदसँग भने ।

राखेपको कार्यक्रम अन्तर्गत क्यानले आयोजना गर्दै आएको छ । यसपटक क्यानले सबै ४३ जिल्लालाई जर्सी उपलब्ध गराएको छ । हरेक जिल्लालाई २० हजार र १२ प्रति बल यस छनोटको लागि दिएको छ । प्रदेशलाई भने ६० हजार छनोटको लागि पठाएको छ । म्यान अफ द म्याचले तीन हजार पाउनेछन् ।

समुह ए मा नेपाल एपीएफ क्लब, त्रिभुवन आर्मी क्लब, गण्डकी प्रदेश, कर्णाली प्रदेश र सुदुरपश्चिम प्रदेश छन् । समुह बि मा नेपाल पुलिस क्लब, बागमती, लुम्बिनी, मधेश र प्रदेश एक छन् । पहिलो दिन टियुमा आर्मी र एपीएफबीच प्रतिस्पर्धा हुने छ । उता मुलपानीमा पुलिस र बागमती भिड्ने छन् ।

फाइनल कार्तिक २६ मा हुने छ । कार्तिक २४ मा सेमिफाइनल हुने छ । समूह एको बिजेता र समुह बि को उप विजेता टियुमा पहिलो सेमिफाइनल खेल्ने छन् । समुह बि को विजेता र समूह ए को उप विजेताले मुलपानीमा दोस्रो सेमिफाइनल खेल्ने छन् ।

पहिलो संस्करणको फाइनल वर्षाको कारण प्रभावित हुँदा उपाधि नेपाल आर्मी र नेपाल पुलिस क्लबले संयुक्त रुपमा बाँडेका थिए । दोस्रो संस्करण २०१८ को फाइनलमा एपिएफले आर्मीलाई ६ विकेटले हराउँदै उपाधि जितेको थियो । तेस्रो संस्करण २०१९ मा पुलिसले आर्मीलाई ४ विकेटले हराउँदै उपाधि जितेको थियो ।

चौथो संस्करणको फाइनलमा एपिएफलाई ३३ रनले हराउँदै आर्मीले उपाधि जितेको थियो । गतवर्ष नेपालले टि२० विश्वकप ग्लोबल छनोट ए खेल्ने भएपछि एकदिवसियको सट्टा क्यानले टि२० शैलीमा गरेको थियो । गतवर्ष टि२० राष्ट्रिय प्रतियोगिता उपाधि एपिएफले पुलिसलाई २१ रनले हराउँदै उपाधि जितेको थियो ।