काठमाडौं (हाम्रो खेलकुद) – नेपाली क्रिकेट टोलीका विकेटकिपर अनिल कुमार शाहले प्रधानमन्त्री कप अन्तर्गत मधेश छनोटमा बाराबाट चौका र छक्काको वर्षा बनाउँदै पर्साविरुद्ध विष्फोटक शतक हानेका छन् ।

टस जितेर पहिला ब्याटिङ गर्दै बाराले निर्धारित ५० ओभरमा ७ विकेट गुमाउँदै ३ सय ६ रन बनायो । बाराको लागि कप्तान अनिल शाहले १ सय १५ बलमा १४ चौका र ९ छक्कासहित १ सय ४९ रनको विष्फोटक शतकीय इनिङ खेले । अनिल पुलिस छाडेर यो पटक देखि मधेश फर्किएका छन् । सानदार शतकका साथ सुरुवात गरेका हुन् । अनिल सफिउल्लाह अन्सारीको बलमा एलबीडब्लू आउट भएका थिए ।
युवा ओपनर तृथ दास ३४, अरनिको यादव २५, निखिल सिंह २० र निकेश गुप्ताले २३ रन बनाए । पर्साको लागि सफिउल्लाह अन्सारी र रन्जित कुमारले तीन तीन विकेट लिए । जितको लागि ३ सय ७ रनको विशाल विजयी लक्ष्य पछ्याएको पर्सा ३७.२ ओभरमा १ सय ४२ रनमा अल आउट भयो ।
पर्साको लागि ओपनर ईमरान शेख १३, शन्तोष कार्की २९, अफ्जल मन्सरी ३६ र हासिम अन्सारीले १६ रन बनाए । बाराको लागि निखिल सिंहले ८.२ ओभरमा १ मेडनसहित ३१ रन खर्चेर ५ विकेट लिए । प्रधानमन्त्री कप कार्तिक १३ देखि काठमाडौंमा सुरु हुनेछ । त्यसको लागि बागमती प्रदेशले मात्र छनोट सकेको छ ।