एजेन्सी – युवा तीव्र गतिका बलर साम करनको कीर्तिमानी पाँच विकेटमा अफगानिस्तानले आइसिसी टि२० विश्वकपमा इंग्ल्यान्डलाई १ सय १३ रनको लक्ष्य दिएको छ ।

पर्थ स्टेडियममा टस हारेर पहिला ब्याटिङको निम्तो पाएको अफगानिस्तान १९.४ ओभरमा १ सय १२ रनमा अल आउट भयो । इंग्ल्यान्डका लागि इब्राहिम जद्रानले ३२ बलमा ३ चौका र १ छक्कासहित ३२ रनमा आउट भए । उस्मान घानीले ३० बलमा ३ चौकासहित ३० रन बनाए ।

ओपनर हज्रातुल्लाह जजाई १७ बलमा १ चौकासहित ७, रमानउल्लाह गुरबाज १० र नाजिबउल्लाह जद्रानले १३ रनमा आउट भए । मोहम्मद नाबी ३ र राशिद खान शून्यमा आउट भए ।

अफगानिस्तानको शीर्षक्रम मार्क वुड र बेन स्टोक्सले धरासयी बनाएका थिए । तल्लोक्रम साम करनले ध्वस्त पारे । साम करन इंग्ल्यान्डबाट टि२० आईमा पाँच विकेट लिने पहिलो बलर हुन् ।

यसअघि टि२० आईमा इंग्ल्यान्डबाट कुनैपनि बलरले ४ माथि विकेट लिन सकेका थिएनन् । टि२० विश्वकप २०२२ को पहिलो खेलमै अलराउन्डर करनले पाँच विकेटका साथ कीर्तिमान रचेका हुन् । जारी विश्वकपमा पाँच विकेट लिने पहिलो खेलाडी समेत हुन् ।

यता अफगानिस्तानका कप्तान मोहम्मद नाबीले पछिल्ला १० खेलमा दोहोरो अंकमा रन बनाउन सकेका छैनन् । त्यस्तै सबै खेलाडी क्याच आउट भएको टेस्ट टोलीमा यो पहिलो पटक हो । यसअघि यसै वर्ष पनि अष्ट्रिया र जमर्नीसँग खेलमा पनि दशैं खेलाडी क्याच आउट भएका थिए ।

इंग्ल्यान्डका साम करनले ३.४ ओभरमा १० रन खर्चेर ५ विकेट लिए । बेन स्टोक्सले ४ ओभरमा १९ रन खर्चेर २ विकेट लिए । मार्कवुडले ४ ओभरमा २३ रन खर्चेर २ विकेट लिए । क्रिस वोक्सले एक विकेट लिए ।