एजेन्सी – युवा तीव्र गतिका बलर साम करनको कीर्तिमानी पाँच विकेटमा इंग्ल्यान्डले आइसिसी टि२० विश्वकपमा अफगानिस्तानलाई ५ विकेटले हराउँदै विजयी सुरुवात गरेको छ ।

जितको लागि १ सय १३ रनको सामान्य विजयी लक्ष्य पछ्याएको इंग्ल्यान्डले १८.१ ओभरमा ५ विकेट गुमाउँदै पूरा गर्यो । इंग्ल्यान्डको जितमा लियाम लिभिङस्टोन २१ बलमा ३ चौकासहित २९ रनमा अविजित रहे ।

कप्तान जस बटलर १८ बलमा ३ चौकासहित १८, एलेक्स हेल्स १९ र डेविड मलान १८ रन बनाए । मलानले ३० बल खेल्दा कुनैपनि चौका र छक्का हान्न सकेनन् ।

बेन स्टोक्स दुई र ह्यारी ब्रुक ७ रनमा आउट भए । मोईन अली १० बलमा ८ रनमा अविजित रहे । अफगानिस्तानका फजलहक फारुकी, मुजिब उर हमान, राशिद खान, फरिद मलिक र मोहम्मद नाबीले एक एक विकेट लिए ।

त्यसअघि पर्थ स्टेडियममा टस हारेर पहिला ब्याटिङको निम्तो पाएको अफगानिस्तान १९.४ ओभरमा १ सय १२ रनमा अल आउट भयो । इंग्ल्यान्डका लागि इब्राहिम जद्रानले ३२ बलमा ३ चौका र १ छक्कासहित ३२ रनमा आउट भए । उस्मान घानीले ३० बलमा ३ चौकासहित ३० रन बनाए ।

ओपनर हज्रातुल्लाह जजाई १७ बलमा १ चौकासहित ७, रमानउल्लाह गुरबाज १० र नाजिबउल्लाह जद्रानले १३ रनमा आउट भए । मोहम्मद नाबी ३ र राशिद खान शून्यमा आउट भए । अफगानिस्तानको शीर्षक्रम मार्क वुड र बेन स्टोक्सले धरासयी बनाएका थिए । तल्लोक्रम साम करनले ध्वस्त पारे । साम करन इंग्ल्यान्डबाट टि२० आईमा पाँच विकेट लिने पहिलो बलर हुन् ।

यता अफगानिस्तानका कप्तान मोहम्मद नाबीले पछिल्ला १० खेलमा दोहोरो अंकमा रन बनाउन सकेका छैनन् । त्यस्तै सबै खेलाडी क्याच आउट भएको टेस्ट टोलीमा यो पहिलो पटक हो । यसअघि यसै वर्ष पनि अष्ट्रिया र जमर्नीसँग खेलमा पनि दशैं खेलाडी क्याच आउट भएका थिए ।

इंग्ल्यान्डका साम करनले ३.४ ओभरमा १० रन खर्चेर ५ विकेट लिए । बेन स्टोक्सले ४ ओभरमा १९ रन खर्चेर २ विकेट लिए । मार्कवुडले ४ ओभरमा २३ रन खर्चेर २ विकेट लिए । क्रिस वोक्सले एक विकेट लिए ।

सुपर १२ को समूह ए मा न्युजिल्यान्ड शीर्ष स्थानमा छ । पहिलो खेलमा न्युजिल्यान्डले घरेलु टोली अष्ट्रेलियालाई ८९ रनले हराउँदै विजयी सुरुवात गरेको छ । इंग्ल्यान्डले २६ अक्टोरमा आयरल्यान्डसँग खेल्नेछ । अफगानिस्तानले त्यसै दिन न्युजिल्यान्डसँग खेल्नेछ ।

सुपर १२ को समूह ए मा अष्ट्रेलिया, न्युजिल्यान्ड, इंग्ल्यान्ड, अफगानिस्तान, श्रीलंका र आयरल्यान्ड छन् । सुपर १२ को समूह बी मा भारत, पाकिस्तान, दक्षिण अफ्रिका, बंगलादेश, नेदरल्यान्ड्स र जिम्बावे छन् । हरेक समूहबाट शीर्ष दुई दुई टोली सेमिफाइनलमा पुग्नेछन् ।