एजेन्सी – ओपनर कुशल मेन्डिसनको अर्धशतकमा श्रीलंकाले आइसिसी टि२० विश्वकपमा आयरल्यान्डमाथि ९ विकेटको सहज जित हात पारेको छ । जितको लागि १ सय २९ रनको विजयी लक्ष्य पछ्याएको श्रीलंकाले १५ ओभरमा १ विकेट गुमाउँदै पूरा गर्यो ।

ओपनर कुशल मेन्डिस ४३ बलमा ५ चौका र ३ छक्कासहित ६८ रनमा अविजित रहे । चरिथ असलांका २२ बलमा २ चौकासहित ३१ रनमा अविजित रहे ।

धनन्जय डि सिल्भा २५ बलमा २ चौका र १ छक्कासहित ३१ रनमा आउट भए । पहिलो विकेटका लागि कुशल र धनन्जय ८.२ ओभरमा ६३ रनको साझेदारी गरेका थिए । गेराथ डेलानीले एक विकेट लिए ।

त्यसअघि होबार्टमा टस जितेर पहिला ब्याटिङ थालेको आयरल्यान्डले निर्धारित २० ओभरमा ८ विकेट गुमाउँदै १ सय २८ रन बनाएको थियो ।

आयरल्यान्डको लागि ह्यारी टेक्टरले ४२ बलमा २ चौका र १ छक्कासहित सर्वाधिक ४५ रन बनाए । पउल स्टर्लिङले २५ बलमा ४ चौका र १ छक्कासहित ३४ रन बनाए । अन्य ब्याटरको प्रदर्शन राम्रो हुन सकेन ।

पाँचौं विकेटका लागि टेक्टर र डोकरेलले ४१ बलमा ४७ रनको साझेदारी गरेका थिए । कप्तान एन्ड्रयु बालबिर्नी दोस्रो ओभरको पहिलो बलमै एक रनमा बोल्ड भए । लाहिरु कुमाराको लेग साइडको बललाई स्वीप खेल्ने धुनमा मिस हुँदा बोल्ड हुन पुगेका थिए ।

पाँचौं ओभरको चौथो बलमा स्पिनर महेश थिक्सनाले लोर्कान टकरलाई १० रनमा बोल्ड आउट गरे । नवौं ओभरको चौंथो बलमा धनन्जय डि सिल्भालाई ठूलो सट खेल्ने धुनमा पउल स्टर्लिङ भानुका राजपक्षेबाट क्याच आउट भए ।

कर्टिस क्याम्फर दुई, गेराथ डेलानी ९, सिमी सिंह ७ र जर्ज डोकरेल १४ रन बनाए । आयरल्यान्डले ७ बलमा तीन रन जोड्न तल्लोक्रमका तीन विकेट गुमाएको थियो ।

श्रीलंकाका स्पिनर महेश थिक्सनाले ४ ओभरमा १९ रन खर्चेर २ विकेट लिए । चामिका करुणारत्नेले ४ ओभरमा २९ रन खर्चेर १ विकेट लिए । वानिन्दु हसरंगाले ४ ओभरमा २५ रन खर्चेर २ विकेट लिए । चामिका करुणारत्ने र धनन्जय डि सिल्भाले एक एक विकेट लिए ।

श्रीलंकाले अव मंगलबार अष्ट्रेलियासँग खेल्नेछ । आयरल्यान्डले बुधबार इंग्ल्यान्डसँग खेल्नेछ । सुपर १२ को समूह ए मा न्युजिल्यान्ड शीर्ष स्थानमा छ । पहिलो खेलमा न्युजिल्यान्डले घरेलु टोली अष्ट्रेलियालाई ८९ रनले हराउँएको थियो । इंग्ल्यान्डले पहिलो खेलमा अफगानिस्तानलाई ५ विकेटले हराएको थियो ।

सुपर १२ को समूह ए मा अष्ट्रेलिया, न्युजिल्यान्ड, इंग्ल्यान्ड, अफगानिस्तान, श्रीलंका र आयरल्यान्ड छन् । सुपर १२ को समूह बी मा भारत, पाकिस्तान, दक्षिण अफ्रिका, बंगलादेश, नेदरल्यान्ड्स र जिम्बावे छन् । हरेक समूहबाट शीर्ष दुई दुई टोली सेमिफाइनलमा पुग्नेछन् । आजको दोस्रो खेलमा भारत र पाकिस्तानबीच दिउँसो १ः४५ मा खेल सुरुहुनेछ ।