एजेन्सी – आइसीसी टि२० विश्वकप २०२२ अन्तर्गत सुपर १२ को खेलमा भारतसँग नाटकीय ढंगले पराजित भएपछि पाकिस्तानका कप्तान बाबर आजमले भारतीय ब्याट्सम्यान विराट कोहलीकै कारण पाकिस्तान पराजित हुन पुगेको बताए ।

विराट कोहलीको सानदार ब्याटिङमा भारतले आइसिसी टि२० विश्वकपमा पाकिस्तानमाथि चार विकेटको रोमान्चक जित दर्ता गरेको हो । जितको लागि १ सय ६० रनको प्रतिस्पर्धात्मक विजयी लक्ष्य पछ्याएको भारतले निर्धारित २० ओभरमा ६ विकेट गुमाउँदै पूरा गर्यो ।

भारतका लागि विराट कोहलीले ५३ बलमा ६ चौका र ४ छक्कासहित ८२ रनमा अविजित रहँदै अविश्वसनयि जित दिलाए । एक समय ३१-४ को स्थितिमा रहेको भारतलाई हार्दिक पान्ड्या र कोहलीले शतकीय साझदारी गर्दै उकासेका थिए । कोहलीले सुरुवातमा संयमित ब्याटिङ गरेपनि अन्त्यमा भने विष्फोटक ब्याटिङ गर्दै जितसम्म डोर्याए ।

खेलपछि बोल्दै पाकिस्तानका कप्तान बाबरले कोहलीले उत्कृष्ट प्रदर्शन गर्दै टोलीलाई जित दिलाएको बताए । ‘खेल निकै प्रतिस्पर्धात्मक रहयो । हामीले बलिङमा राम्रो सुरुवात गरेका थियौं । तर कोहली र पान्ड्याले राम्रो खेले । आफ्नो पक्षमा खेल ल्याउँदै राम्रो फिनिस गरे । नयाँ बलमा स्विङ र सिमका कारण सहज थिएन,’ उनले भने ।

‘हामीले खेल जित्ने अवसर थियो । एक आपसमा विश्वास गर्न भनेका थियौं, तर कोहलीकै प्रदर्शनका कारण हार्यौं । हामीलाई विकेटको जरुरत थियो, त्यसैले हामीले मुख्य बलरलाई अगाडी नै प्रयोग गर्यौं । नवाजले अन्तिम ओभर गर्नुको कारण त्यहि हो ।’

‘हामीले यस खेलबाट सकारात्मक पक्ष पाएका छौं । इफ्तिखारले राम्रो ब्याटिङ गरे । शानले पनि इनिङलाई राम्रो अन्त अन्त्य गरे ।’

यो पनि : कोहलीको सानदार ब्याटिङमा भारतको नाटकीय जित