काठमाडौं (हाम्रो खेलकुद) – ओपनर क्लेयर टेलर शतकबाट चुक्दा विश्वचर्चित मेरिलेबोन क्रिकेट क्लब (एमसिसी) ले नेपाली तीन खेलाडी सम्मीलित आइसिसी यु१९ टोलीलाई १ सय ७६ रनको विशाल लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ रोजेको एमसिसीले निर्धारित २० ओभरमा ३ विकेट गुमाउँदै १ सय ७५ रन बनायो । एमसिसीको लागि ओपनर क्लेयर टेलरले ६६ बलमा १५ चौकासहित सर्वाधिक ९७ रनमा बोल्ड भइन् ।

उनी १९ औं ओभरको पाँचौं बलमा समाइरा धारनिधर्कको बलमा बोल्ड भएपछि शतकबाट मात्रै तीन रनले चुकेकी थिइन् ।
टेलर विश्व महिला क्रिकेट टोलीकै एक सर्वाधिक सफल ब्याटर हुन् । ४७ वर्षीय उनले १५ टेस्ट, १ सय २६ महिला ओडिआई र २७ महिला टि२० आई खेल खेलेकी छिन् ।

पहिलो विकेटका लागि टेलर र मिया रोजर्सले ७१ रनको साझेदारी गर्दै राम्रो सुरुवात दिलाए । दोस्रो विकेटका लागि टेलर र अमान्डा पोटगीटरले ८९ रनको साझेदारी गरेका थिए अमान्डा २६ बलमा ३ चौका र २ छक्कासहित ४० रनमा आउट भइन् ।

मिया रोजर्सले २५ बलमा १ चौकासहित १६ र राहेल पोटरले ४ रन बनाईन् । आइसिसी यू-१९ को लागि कृतिका मरासिनीले ४ ओभरमा २६ रन खर्चेर १ विकेट लिइन् । वैष्णवी महेश र समाइराले एक एक विकेट लिए ।

आइसिसीले यू१९ विश्वकप छनोटमा एसिया छेत्रबाट उत्कृष्ट प्रदर्शन गर्ने विभिन्न देशक १३ खेलाडी समेटेर टोली बनाएको छ । जुन टोलीले तीन खेल खेल्नेछ । नेपालबाट कृतिका, सृष्टी जैशी र आश्मा पुलामी मगर छन् ।