एजेन्सी – अलराउन्डर मार्कस स्टोइनिसको विष्फोटक ब्याटिङमा साविक विजेता तथा घरेलु टोली अष्ट्रेलियाले आइसिसी टि२० विश्वकप २०२२ मा श्रीलंकालाई ७ विकेटले पराजित गर्दै पहिलो जित हात पारेको छ । जितको लागि १ सय ५८ रनको विजयी लक्ष्य पछ्याएको अष्ट्रेलियाले १६.३ ओभरमा ३ विकेट गुमाउँदै पूरा गर्यो।

अष्ट्रेलियाको जितमा मार्कस स्टोइनिसले १८ बलमा ४ चौका र ६ छक्कासहित ५८ रनको विष्फोटक अविजित इनिङ खेले । विष्फोटक ब्याटिङ गनेक्रममा स्टोइनिसले १७ बलमै अर्धशतक हानेका थिए । कप्तान आरोन फिन्च ४२ बलमा १ छक्कासहित ३१ रनमा अविजित रहे । चौथो विकेटका लागि फिन्च र स्टोइनिसले मात्र २५ बलमा ६९ रनको साझेदारी गरे ।

अष्ट्रेलियाको सुरुवात संघर्षपूर्ण रह्यो । पहिलो पावर प्लेमा कुनैपनि बाउन्ड्री प्रहार गर्न सकेन । मिचेल मार्शले आठौं ओभरको दोस्रो बलमा वानिन्दु हसरंगालाई चौका हान्दै पहिलो बाउन्ड्री प्रहार गरे ।

ओपनर डेविड वार्नर स्पिनर महेथ थिक्सनाको बलमा कप्तान दाशुन शनकाबाट ११ रनमा क्याच आउट भए । उनले १० बल खेलेका थिए ।

स्पिनर धनन्जय डि सिल्भाको नवौं ओभरको तेस्रो बलमा ठूलो सट खेलेका मार्श हसरंगाबाट १८ रनमा क्याच आउट भए । उनले १७ बलमा १ चौका र १ छक्का प्रहार गरे । मार्श आउट भएपछि क्रिजमा आएका ग्लेन म्याक्सवेलले आक्रामक ब्याटङ गर्दै १२ बलमा २ चौका र २ छक्कासहित २३ रनमा क्याच आउट भए ।

त्यसपछि क्रिजमा आएका मार्कस स्टोइनिसले विष्फोटक इनिङ खेल्दै सहज जित दिलाए । सुरुवाती दुई ओभरमा तीन रन मात्र खर्चेका थेक्सनालाई स्टोइनिसले १६ औं ओभरमा तीन छक्कासहित कुल २० रन जोडेका थिए । स्टोइनिसले चौका र छक्काको वर्षा गराउँदै खेललाई सहज जित दिलाए । श्रीलंकाका स्पिनर महेश थिक्सना, धनन्जय डि सिल्भा र चामिका करुणारत्नले एक एक विकेट लिए ।

त्यसअघि पर्थमा टस हारेर पहिला ब्याटिङको निम्तो पाएको श्रीलंकाले निर्धारित २० ओभरमा ६ विकेट गुमाउँदै १ सय ५७ रन बनाएको थियो । श्रीलंकाका ओपनर पाथुम निसांकाले ४५ बलमा २ चौकासहित सर्वाधिक ४० रन बनाए । चरिथ असलंकाले २५ बलमा ३ चौका र २ छक्कासहित ३८ रन जोडे ।

ओपनर कुशल मेन्डिस पाँच रनमै आउट भए । तीव्र गतिका बलर प्याट कमिन्सको दोस्रो ओभरको पाँचौं बलमा एज लागेर कुशल मिचेल मार्शबाट क्याच आउट भए । दोस्रो विकेटका लागि धनन्जय डि सिल्भा र निसांकाले ६९ रनको साझेदारी गरेका थिए ।

एश्टर्न अगरको बलमा डि सिल्भा लङअफमा डेविड वार्नरबाट उत्कृष्ट क्याच आउट भए । सिल्भाले २३ बलमा ३ चौका प्रहार गरे । १४ औं ओभरको तेस्रो बलमा निसांका रन आउट हुन पुगे । लगातार विकेट गुमाउनेक्रममा भानुका राजपक्षे ७ र कप्तान दाशुन शनका ५ रनमा आउट भए ।

चामिका करुणारत्नेले ७ बलमा २ चौकासहित १४ रन बनाए । अष्ट्रेलियाका जोश हेजलवुड, प्याट कमिन्स, मिचेल स्टार्क, एश्टन अगर र ग्लेन म्याक्सवेलले एक एक विकेट लिए ।

अष्ट्रेलिया पहिलो खेलमा न्युजिल्यान्डसँग ८९ रनले पराजित भएको थियो । श्रीलंकाले आयरल्यान्डलाई ९ विकेटले हराएको थियो । सुपर १२ को समूह ए मा रहेको अष्ट्रेलियाले तेस्रो खेलमा शुक्रबार इंग्ल्यान्डसँग खेल्नेछ । सेमिफाइनल खेल्न उक्त खेल अष्ट्रेलियालाई जित्नै पर्ने हुन्छ । श्रीलंकाले न्युजिल्यान्डसँग शनिबार खेल्नेछ ।

अंक तालिका

सुपर १२ को समूह ए मा न्युजिल्यान्ड, इंग्ल्यान्ड, श्रीलंका र अष्ट्रेलियाको समान २ अंक छ । तर नेटरनरेटको कारण क्रमश पहिलो, दोस्रो, तेस्रो र चौथो स्थानमा छन् । अफगानिस्तान र आयरल्यान्ड अंक विहीन हुँदै पाँचौं र पुछारमा छन् ।

सुपर १२ को समूह बी मा बंगलादेश शीर्ष र भारत दोस्रो स्थानमा छ । दुबै टोलीको समान २ अंक भएपनि नेटरनरेटमा बंगलादेश अघि छ । दक्षिण अफ्रिका र जिम्बावे एक एक अंकका साथ तेस्रो र चौथो स्थानमा छन् । यी दुई देशबीचको खेल वर्षाको कारण रद्ध भएको थियो । पाकिस्तान र नेदरल्यान्ड्स भने अंक विहीन छन् ।