एजेन्सी – न्युजिल्यान्डले आइसिसी टि२० विश्वकपमा आज अफगानिस्तानसँग खेल्दैछ । खेल नेपाली समय अनुसार दिउँसो १: ४५ मा मेलवर्न क्रिकेट ग्राउन्डमा सुरुहुनेछ । न्युजिल्यान्ड लगातार दोस्रो जितको सोचमा छ ।

पहिलो खेलमा घरेलु टोली अष्ट्रेलियालाई ८९ रनले पराजित गरेको न्युजिल्यान्डको मनोबल उच्च छ । यता अफगानिस्तान पहिलो खेलमा इंग्ल्यान्डसँग ५ विकेटले पराजित गरेको थियो । अष्ट्रेलियालाई हराउन न्युजिल्यान्डले ब्याटिङ र बलिङ दुबैमा सानदार प्रदर्शन गरेको थियो ।

अष्ट्रेलियाविरुद्ध २ सय रन बनाउन ओपनर फिन एलेनले १६ बलमा ५ चौका र ३ छक्कासहित ४२ रनको आक्रामक सुरुवात दिलाएका थिए । एलेन आक्रामक ब्याटिङका लागि चिनिन्छन् । अफगानिस्तानविरुद्ध पनि उनको भूमिका पावर प्लेको फाइदा उठाउँदै सर्वाधिक रन बनाउने हुनेछ । डेभन कन्वेले ५८ बलमा ९२ रन जोडेका थिए ।

कन्वे न्युजिल्यान्डका भरपर्दा ब्याटर हुन् । उनी राम्रो लयमा छन् । कप्तान केन विलियम्सनबाट न्युजिल्यान्ड ठूलो र आक्रामक इनिङ चाहन्छ । ग्लेन फिलिप्स, जेम्श निशम, मार्क च्यापम्यान र मिचेल सान्टनार मध्यक्रमका ब्याटर हुन् । फिलिप्स र निशम भने राम्रो ब्याटिङका लागि चिनिन्छन् ।

तीव्र गतिका बलर ट्रेन्ट बोल्ट, टिम साउथी र लोकी फर्गुसनको जोडीले अफगानिस्तानका ब्याटरलाई निरिह बनाउन सक्छन् । स्पिनरमा मिचेल सान्टनार र ईश सोधी हुनेछन् । न्युजिल्यान्डको टिम सन्तुलन रहेको छ ।

यता अफगानिस्तान न्युजिल्यान्डलाई सरप्राइज दिन चाहन्छ । ओपनर हज्रतातुल्लाह जजाई र रहमानउल्लाह गुरबाज प्रमुख ब्याटर हुन् । गुरबाजले पछिल्लो समय लगातार उच्च प्रदर्शन गर्दै आएका छन् । मध्यक्रमका ब्याटर इब्राहिम जद्रान, उस्मान घानी र नाजिबउल्लाह ज्रदानबाट राम्रो प्रदर्शन चाहन्छ ।

राशिद खान र मोहम्मद नाबी फिनिसर हुन् । नाबीले पछिल्ला १० इनिङमा दोहोरो अंकमा रन बनाउन सकेका छैनन् ।अफगानिस्तानको मुख्य हतियार नै स्पिन आक्रामण हो । राशिद खान, मुजिब उर रहमान र नाबी यी तीन स्पिनर सामु रन जोड्न न्युजिल्यान्डका ब्याटरलाई सहज भने हुने छैन ।

अफगानिस्तानको जित पनि यी तीन स्पिनरको प्रदर्शनमा धेरै निर्भर छ । न्युजिल्यान्ड र अफगानिस्तानबीच एक मात्र टि२० आई खेल भएको छ । गतवर्ष विश्वकपमा न्युजिल्यान्डले अफगानिस्तानलाई ८ विकेटले हराएको थियो । उक्त खेलमा ट्रेन्ट बोल्टले ४ ओभरमा १७ रन खर्चेर ३ विकेट लिँदै प्लेयर अफ द म्याच चुनिएका थिए ।

पहिलो खेलको प्रदर्शन हेर्दा दुबै टोलीमा परिवर्तनको सम्भावना कम छ । पहिलो खेलमा भने इंल्यान्ड र आयरल्यान्डबीच हुँदैछ । इंग्ल्यान्डले टस जितेर पहिला फिल्डिङको निर्णय लिएको छ ।

अंक तालिका

सुपर १२ को समूह ए मा न्युजिल्यान्ड १ खेलमा २ अंकका साथ शीर्ष स्थानमा छ । न्युजिल्यान्डको नेटरनरेट प्लस ४.४५० छ । दोस्रो स्थानमा रहेको इंग्ल्यान्डको २ अंकका साथ नेटरनरेट प्लस ०.६२० छ ।

२ खेलमा १ मा जित र १ मा हार सहित अष्ट्रेलिया चौथो स्थानमा छ । अष्ट्रेलियाको नेटरनरेट माइनस १.५५५ छ । यी तीन मध्य दुई टोली सेमिफाइनलका प्रमुख दाबेदार हुन् । त्यसैले नेटरनरेटमा पनि ध्यान दिनुपर्ने हुन्छ । श्रीलंका २ खेलमा १ मा जित र १ मा हार सहित तेस्रो स्थानमा छ । अफगानिस्तान र आयरल्यान्ड क्रमश पाँचौं र पुछारमा छन् ।

यता सुपर १२ को समूह बी मा बंगलादेश शीर्ष र भारत दोस्रो स्थानमा छ । दुबै टोलीको समान २ अंक भएपनि नेटरनरेटमा बंगलादेश अघि छ । दक्षिण अफ्रिका र जिम्बावे एक एक अंकका साथ तेस्रो र चौथो स्थानमा छन् । यी दुई देशबीचको खेल वर्षाको कारण रद्ध भएको थियो । पाकिस्तान र नेदरल्यान्ड्स भने अंक विहीन छन् ।