काठमाडौं (हाम्रो खेलकुद) – लगातार वर्षाको कारण आइसिसी टि२० विश्वकपमा अफगानिस्तान र न्युजिल्यान्डबीच खेल रद्ध भएको छ । मेलबर्न क्रिकेट ग्राउन्डमा हुनुपर्ने खेल टस पनि हुन नपाई रद्ध भएको हो ।

खेल नेपाली समय अनुसार १: ४५ मा सुरु हुनुपर्ने थियो । तर वर्षाको कारण हुन सकेन । त्यसैले दुबै टोलीले एक एक अंक बाँडेका छन् । जारी विश्वकपमा वर्षाको कारण अंक बाँड्नु परेको यो दोस्रो खेल हो । यसअघि जिम्बावे र दक्षिण अफ्रिकाबीचको खेल पनि पूरा हुन नपाउँदा रद्ध भएको थियो । जसको कारण एक एक अंक बाँडेका थिए । वर्षाले प्रभावित बनेको तेस्रो खेल हो ।

वर्षाको कारण इंग्ल्यान्ड डकवर्थ लेविस पद्धतिको आधारमा आयरल्यान्डसँग ५ रनले स्तब्ध हुन पुग्यो । जितको लागि १ सय ५८ रनको विजयी लक्ष्य पछ्याएको इंग्ल्यान्ड १४.३ ओभरमा १०५–५ को अवस्थामा खेल रोकिएको थियो । पुन खेल हुन नसकेपछि पराजित हुन पुग्यो ।

अव विहीबार तीन खेल हुनेछन् । दक्षिण अफ्रिका र बंगलादेशबीचको खेल विहान ८ : ४५ मा हुनेछ । दोस्रो खेलमा भारत र नेदरल्यान्ड्सबीच दिउँसो १२: ४५ मा सुरु हुनेछ । तेस्रो खेलमा पाकिस्तान र जिम्बावेबीच दिउँसो ४: ४५ मा खेल हुनेछ ।

अंक तालिका :

सुपर १२ को समूह ए मा न्युजिल्यान्ड २ खेलमा ३ अंकका साथ शीर्ष स्थानमा छ । श्रीलंका, इंग्ल्यान्ड, आयरल्यान्ड र अष्ट्रेलियाले एक खेलमा जित र एक खेलमा हारका साथ २-२ अंक जोडेका छन् ।

नेटरनरेटको कारण श्रीलंका दोस्रो, इंग्ल्यान्ड तेस्रो, आयरल्यान्ड चौथो र अष्ट्रेलिया पाँचौं स्थानमा छन् । अफगानिस्तान २ खेलमा १ अंकका साथ पुछारमा छ ।

यता सुपर १२ को समूह बी मा बंगलादेश शीर्ष र भारत दोस्रो स्थानमा छ । दुबै टोलीको समान २ अंक भएपनि नेटरनरेटमा बंगलादेश अघि छ । दक्षिण अफ्रिका र जिम्बावे एक एक अंकका साथ तेस्रो र चौथो स्थानमा छन् । यी दुई देशबीचको खेल वर्षाको कारण रद्ध भएको थियो । पाकिस्तान र नेदरल्यान्ड्स भने अंक विहीन छन् ।