एजेन्सी – दक्षिण अफ्रिकाले आइसिसी टि२० विश्वकपमा आज बंगलादेशसँग खेल्दैछ । खेल नेपाली समय अनुसार बिहान ८ : ४५ मा सिड्नी क्रिकेट ग्राउन्डमा सुरुहुनेछ ।

दक्षिण अफ्रिका पहिलो जितको सोचमा छ । पहिलो खेलमा दक्षिण अफ्रिकाले जिम्बावेसँग बर्षाको कारण अंक बाँड्न बाध्य भएको थियो । बंगलादेश भने दोस्रो जितको सोचमा हुनेछ । बंगलादेशले नेदरल्यान्ड्सलाई ९ रनले हराएको थियो । दक्षिण अफ्रिकालाई शीर्ष दुईमा रहँदै सेमिफाइनल खेल्न सबै खेल जित्नुपर्ने हुन्छ ।

जिम्बावेसँग खेल रद्ध हुँदा ओपनर क्विन्टन डि कक १८ बलमा ८ चौका र १ छक्कासहित ४७ रनमा अविजित थिए । बायाँ हाते विकेटकिपर डि कक विष्फोटक ब्याटर हुन् । उनको लयले दक्षिण अफ्रिकाले सहज जित हात पार्न सक्छ । कप्तान टेम्बा बभुमाको प्रदर्शन भने कमजोर छ । उनलाई उत्कृष्ट सुरुवात दिलाउनु पर्ने आवश्यक छ । सुस्त शैलीमा खेल्ने बभुमा आफैं दबाबमा छन् ।

राइली रोसोउ, एडेन माक्ररम, डेविड मिलर, ट्रिस्टन स्टब्स मध्यक्रम र फिनिसर हुन् । राइली रोसोउ राम्रो लयमा छन् । अघिल्लो महिना उनले भारतविरुद्ध शतक हानेका थिए । मिलर विपक्षी बलरलाई किलर बन्दै आएका छन् । लगातार विष्फोटक ब्याटिङ गर्दै आएका मिलरको लय रोक्न बंगलादेशलाई मुख्य चुनौती हुनेछ । बंगलादेशविरुद्ध नै मिलरले टि२० आईमा ३५ बलमा शतक हानेका थिए ।

युवा ब्याटर स्टब्स फिनिसर हुनेछन् । तीव्र गतिका बलरमा वेन पार्नेल, कागिसो रबाडा र एनरिच नोर्किया रहनेछन् । स्पिनरमा केशव महाराज हुनेछन् ।

यता बंगलादेशको ब्याटिङ कमजोरीको रुपमा छ । कप्तान सकिब अल हसन प्रमुख ब्याटर हुन् । उनको प्रदर्शनमा धेरै निर्भर रहँदै आएको छ । ओपनर लिटन दास, सौम्य सरकार र नाज्मुल शान्टो शीर्ष तीन ब्याटर हुन् । यी तीन ब्याटरबाट बंगलादेश राम्रो सुरुवात चाहन्छ । युवा खेलाडी अफिफ हुसैन फिनिसर हुन् ।

यता तस्किन अहमदले राम्रो प्रदर्शन गर्दै आएका छन् । तीव्र गतिका बलर अहमदले नेदरल्यान्ड्सलाई हराउन चार विकेट लिएका थिए । उनलाई मुश्ताफिजुर रहमानले साथ दिनेछन् । रहमान बंगलादेशका प्रमुख बलर हुन् । उनी अफ कटर बलका लागि चिनिन्छन् । हसन मोहम्मद स्पिनरको रुपमा खेल्नेछन् । उनलाई स्पिन आक्रामणमा सकिबले साथ दिनेछन् ।

आज विश्वकपमा तीन खेल हुनेछन् । दोस्रो खेलमा भारत र नेदरल्यान्ड्सबीच दिउँसो १२: ४५ मा सुरुहुनेछ । दिउँसो ४ : ४५ मा पाकिस्तान र जिम्बावेले खेल्नेछन् ।
हेड टु हेड :

दक्षिण अफ्रिका र बंगलादेशबीच कुल ७ टि२० आई खेल भएका छन् । सबै खेलमा दक्षिण अफ्रिका विजयी भएका छन् ।

अंक तालिका :

सुपर १२ को समूह ए मा न्युजिल्यान्ड २ खेलमा ३ अंकका साथ शीर्ष स्थानमा छ । श्रीलंका, इंग्ल्यान्ड, आयरल्यान्ड र अष्ट्रेलियाले एक खेलमा जित र एक खेलमा हारका साथ २-२ अंक जोडेका छन् ।

नेटरनरेटको कारण श्रीलंका दोस्रो, इंग्ल्यान्ड तेस्रो, आयरल्यान्ड चौथो र अष्ट्रेलिया पाँचौं स्थानमा छन् । अफगानिस्तान २ खेलमा १ अंकका साथ पुछारमा छ ।

यता सुपर १२ को समूह बी मा बंगलादेश शीर्ष र भारत दोस्रो स्थानमा छ । दुबै टोलीको समान २ अंक भएपनि नेटरनरेटमा बंगलादेश अघि छ । दक्षिण अफ्रिका र जिम्बावे एक एक अंकका साथ तेस्रो र चौथो स्थानमा छन् । यी दुई देशबीचको खेल वर्षाको कारण रद्ध भएको थियो । पाकिस्तान र नेदरल्यान्ड्स भने अंक विहीन छन् ।