एजेन्सी – दक्षिण अफ्रिकाका शीर्षक्रमका ब्याटर राइली रोसोउले आइसिसी टि२० विश्वकपमा बंगलादेशविरुद्ध ऐतिहासिक शतक हानेका छन् ।

सिड्नी क्रिकेट ग्राउन्डमा टस जितेर पहिला ब्याटिङ थालेको दक्षिण अफ्रिकाले १७ ओभरमा ३ विकेट गुमाउँदै १ सय ८९ रन बनाएको छ । दक्षिण अफ्रिका राइली रोसोउ ५३ बलमा ७ चौका र ८ छक्कासहित १ सय ६ रनमा अविजित छन् ।

उनले ५२ बलमा आफ्नो टि२० आई करिअरको दोस्रो शतक हाने । उनी दक्षिण अफ्रिकाबाट टि२० आई विश्वकपमा शतक हान्ने पहिलो खेलाडी हुन् ।

क्विन्टन डि कक ३८ बलमा ७ चौका र ३ छक्कासहित ६३ रनमा आउट भए । दोस्रो विकेटका लागि डि कक र रोसोउले १ सय ६३ रनको साझेदारी गरे । विश्वकप इतिहासमा यो कुनैपनि विकेटका लागि भएको दोस्रो उच्च साझेदारी हो ।

यसअघि टि२० विश्वकपमा २०१० मा श्रीलंकाका कुमार संगाकारा र महेला जयवर्धनेले वेस्टइन्डिजविरुद्ध दोस्रो विकेटका लागि १ सय ६६ रनको साझेदारी गरेका थिए । जुन उच्च रहँदै आएको छ ।

तीव्र गतिका बलर तस्किन अहमदको पहिलो ओभरको अन्तिम बलमा कप्तान टेम्बा बभुमा २ रनमा क्याच आउट भए । अफिफ हुसैनको १५ औं ओभरको तेस्रो बलमा ठूलो सटको चक्करमा डि कक लङअफमा सौम्य सरकारबाट क्याच आउट भए ।