एजेन्सी – विराट कोहली सहित तीन ब्याटरको अर्धशतकमा भारतले आइसिसी टि२० विश्वकपमा नेदरल्यान्ड्सलाई १ सय ८० रनको प्रतिस्पर्धात्मक लक्ष्य दिएको छ । सिड्नी क्रिकेट ग्राउन्डमा टस जितेर पहिला ब्याटिङ रोजेको भारतले निर्धारित २० ओभरमा २ विकेट गुमाउँदै १ सय ७९ रन बनायो ।

भारतका लागि विराट कोहलीले ४४ बलमा ३ चौका र २ छक्कासहित सर्वाधिक ६२ रनमा अविजित रहे । कोहलीले जारी विश्वकपमा लगातार दोस्रो अर्धशतक हो । कोहलीले पाकिस्तानविरुद्ध ८२ रनको इनिङ खेल्दै ४ विकेटको जित दिलाएका थिए । कप्तान रोहित शर्मा ३९ बलमा ४ चौका र ३ छक्कासहित ५३ रनमा आउट भए ।

तीव्र गतिका बलर पाउल भान माक्रेनले ओपनर लोकेश राहुललाई ९ रनमा एलबीडब्लू आउट गरे । राहुलले १२ बलमा एक चौका हाने । दोस्रो विकेटका लागि कोहली र रोहितले ७३ रनको साझेदारी गरेका थिए ।

रोहित फर्द क्लासेनको बलमा डिप मिडविकेटमा क्याच आउट हुन पुगे । रोहितले पाँचौं ओभरको अन्तिम बलमा ब्यक्तिगत १३ रनमा जीवनदान पाएका थिए । फर्द क्लासेनको बलमा प्रिन्गलले क्याच ड्रप गरेका थिए ।

त्यस्तै सूर्यकुमार यादवले २५ बलमा ७ चौका र १ छक्कासहित ५१ रनमा अविजित रहे । तेस्रो विकेटका लागि विराट र सूर्यले ४८ बलमा ९५ रनको साझेदारी गरेका थिए । नेदरल्यान्ड्सका बलरले सुरुवात देखिनै भारतीय ब्याटरलाई खुलेर खेल्न दिएनन् । नेदरल्यान्ड्सका पाउल भान मार्केन र फर्द क्लासेनले एक एक विकेट लिए ।