एजेन्सी – आइसिसी टि२० विश्वकपमा आज उपाधिका दुई प्रमुख दाबेदार इंग्ल्यान्ड र अष्ट्रेलियाबीच प्रतिस्पर्धा हुँदैछ । खेल नेपाली समय अनुसार दिउँसो १ : ४५ मा मेलबर्न क्रिकेट ग्राउन्डमा सुरुहुनेछ ।

दुबै टोलीलाई शीर्ष दुईमा रहँदै सेमिफाइनल खेल्न यस खेल जित्नै पर्ने दबाब छ । आज पराजित हुने टोलीको सेमिफाइनल यात्रा कठिन बन्नेछ । इंग्ल्यान्डले पहिलो खेलमा अफगानिस्तानलाई ५ विकेटले हराएको थियो । तर वर्षाको कारण आयरल्यान्डसँग इंग्ल्यान्ड पाँच रनले डकवर्थ लेविस पद्धतिको आधारमा स्तब्ध भएपछि बाँकी सबै खेल जित्नु पर्ने दबाब बढेको हो ।

यता अष्ट्रेलिया पहिलो खेलमा न्युजिल्यान्डसँग ८९ रनले स्तब्ध भएको थियो । दोस्रो खेलमा श्रीलंकालाई ७ विकेटले हराएको थियो । यस खेल बाहेक इंग्ल्यान्डले अव न्युजिल्यान्ड र श्रीलंकासँग खेल्न बाँकी छ । अष्ट्रेलियाले अव आयरल्यान्ड र अफगानिस्तानसँग खेल्न बाँकी छ । सेमिफाइनल खेल्न तीनै खेल जित्नु पर्ने हुन्छ ।

यदि पराजित हुँदा न्युजिल्यान्डमा भर पर्छ । न्युजिल्यान्डले अव इंग्ल्यान्ड, श्रीलंका र आयरल्यान्डसँग खेल्न बाँकी छ । आज पराजित हुने टोली सेमिफाइनलमा पुग्न न्युजिल्यान्डले कम्तिमा दुई खेल हारेको हुनुपर्छ ।

अष्ट्रेलिया शीर्षक्रम ब्याटिङ चल्न सकेको छैन । ओपनर डेविड वार्नर र फिन्च दुबैको प्रदर्शन राम्रो छैन । यी दुई ब्याटरबाट राम्रो प्रदर्शन चाहन्छ । मिचेल मार्श र ग्लेन म्याक्सवेलको लय पनि राम्रो छैन । केहि दबाबमा रहनेछन् । ठूलो खेलमा उनीहरुबाट उच्च प्रदर्शनको अपेक्षा गरिएको छ ।

मार्कस स्टोइनिसले श्रीलंकाविरुद्ध १७ बलमै अर्धशतक हानेका थिए । उनको लय घातक बन्न सक्छ । टिम डेविड र म्याथ्यु वेड फिनिसरको रुपमा रहनेछन् । म्याथ्यु वेडलाई कोभिड देखिएको छ । यदि उनी फिट नभएमा अष्ट्रेलिया टोलीमा व्याकअप विकेटकिपर भने छैन ।

अष्ट्रेलियाले प्याट कमिन्सको स्थानमा क्यामरन ग्रीनलाई मौका दिनसक्छ । कमिन्सले राम्रो बलिङ गर्न सकेका छैनन् । त्यसैले ग्रीन राम्रो विकल्प बन्न सक्छन् । जोश हेजलवुड र मिचेल स्टार्क प्रमुख हतियार हुन् ।

यता इंग्ल्यान्डका ओपनर एलेक्स हेल्स र जस बटलरले पनि सुरुवाती खेलमा राम्रो प्रदर्शन गर्न सकेका छैनन् । उनीबाट राम्रो सुरुवात चाहन्छ । डेविड मलान र बेन स्टोक्सले जिम्मेवारी इनिङ खेल्नु पर्ने हुन्छ । त्यसपछि लियाम लिभिङस्टोन, मोईन अली र साम करन हुनेछन् । इंल्यान्डको तीव्र गतिको बलरमा मार्क वुड, क्रिस वोक्स र साम करन हुनेछन् ।

दुबै टोलीको ब्याटिङमा गहिराई, आक्रामक र विश्वस्तरिय ब्याटर छन् । तीव्र गतिको बलिङ आक्रामण दुबैको उत्कृष्ट छ । दुबै टोलीलाई जित्नै पर्ने दबाब हुँदा खेल कडा प्रतिस्पर्धा हुने अनुमान गरिएको छ ।

हेड टु हेड :

इंग्ल्यान्ड र अष्ट्रेलियाबीच टि२० आईमा कुल २३ खेल भएका छन् । जसमा इंग्ल्यान्ड ११ र अष्ट्रेलिया १० खेलमा विजयी भएका छन् । पछिल्ला पाँच भेटमा इंग्ल्यान्ड तीन खेलमा विजयी हुँदा एक खेलमा पराजित भएको छ । एक खेलमा नतिजा विहीन छ ।

अंक तालिका :

सुपर १२ को समूह ए मा न्युजिल्यान्ड २ खेलमा ३ अंकका साथ शीर्ष स्थानमा छ । श्रीलंका, इंग्ल्यान्ड, आयरल्यान्ड र अष्ट्रेलियाले एक खेलमा जित र एक खेलमा हारका साथ २-२ अंक जोडेका छन् । नेटरनरेटको कारण श्रीलंका दोस्रो, इंग्ल्यान्ड तेस्रो, आयरल्यान्ड चौथो र अष्ट्रेलिया पाँचौं स्थानमा छन् । अफगानिस्तान २ खेलमा १ अंकका साथ पुछारमा छ ।

सुपर १२ को समूह बी मा भारत २ खेलमा ४ अंकका साथ शीर्ष स्थानमा छ । दक्षिण अफ्रिका २ खेलमा १ मा जित र १ मा अंक बाड्दै ३ अंकका साथ दोस्रो स्थानमा छ ।

जिम्बावे २ खेलमा १ मा जित र १ मा अंक बाँड्दै ३ अंकका साथ तेस्रो स्थानमा छ । बंगलादेश २ खेलमा १ मा जित र १ मा हारसहित चौथो स्थानमा छ । पाकिस्तान र नेदरल्यान्ड्स अंक विहीन हुँदै पुछारमा छन् ।