काठमाडौं (हाम्रो खेलकुद) – लुम्बिनी प्रदेशले आक्रामक ब्याटर सौरभ खनाललाई बाहिर राख्दै युवा ब्याटर देव खनालको कप्तानीमा प्रधानमन्त्री कप एकदिवसिय राष्ट्रिय प्रतियोगिता खेल्ने १४ सदस्य टोली घोषणा गरेको छ ।

कप्तान र उपकप्तान दुबै परिवर्तन गरेको लुम्बिनीले सौरभलाई बाहिर राख्दा युवा खेलाडीलाई मौका दिएको छ । सौरभलाई फिटनेश र ५० ओभरको खेलको कारण बाहिर राखेको लुम्बिनीले जनाएको छ । कृष्ण कार्कीलाई कप्तानबाट हटाउँदै देवलाई कप्तानको जिम्मेवारी दिएको हो ।

देवको कप्तानीमा लुम्बिनीले गतवर्ष यू१९ राष्ट्रिय प्रतियोगिता जित्नुको साथै नेपालले यू-१९ एसिया कप खेलेको थियो । नेपालका ओपनर समेत रहेका देवले लुम्बिनी सिनियर टोली पहिलो पटक सम्हाल्लेका हुन् । त्यस्तै अलराउन्डर बसिर अहमदलाई पनि लुम्बिनीले उपकप्तान जिम्मेवारी दिएको छ ।

यू-१९ राष्ट्रिय प्रतियोगिता जित्दाका ११ खेलाडी ( देव, बसिर, प्रज्ज्वल थापा, नरेश नेपाली, सुनिल भण्डारी, आकाश त्रिपाठी, मोहम्मद हुसेन, विशाल विक्रम केसी, तुल बहादुर थापा, दुर्गेश गुप्ता र अभिषेक गौतम) छन् ।

मोहम्मद हुसेन र दुर्गेशको जोडी टोलीमा फर्किएको छ । यी दुई तीव्र गतिका बलर गुप्ता र हुसेनको जोडीको उच्च प्रदर्शनमा लुम्बिनीले उपाधि जितेको थियो । बायाँ हाते बलर हुसैन स्वींगका लागि चिनिन्छन् ।

लुम्बिनीको अनुभवी खेलाडीमा कृष्ण कार्की र सन्दीप रजाली छन् । लुम्बिनीले युवा खेलाडीलाई प्राथमिकतामा राख्दा टोलीमा व्यापक परिवर्तन गरेको छ ।

प्रधानमन्त्री कप कार्तिक १३ देखि २६ गते सम्म काठमाडौंमा हुनेछ । लुम्बिनी प्रदेश समूह बी मा छ । समूह बी मा नेपाल पुलिस क्लब, बागमती प्रदेश, लुम्बिनी प्रदेश, मधेश प्रदेश र प्रदेश १ छन् । समूह ए मा नेपाल एपिएफ क्लब, त्रिभुवन आर्मी क्लब, गण्डकी प्रदेश, सुदूरपश्चिम र कर्णाली प्रदेश छन् ।

लुम्बिनीले पहिलो खेल कार्तिक १६ मा लुम्बिनीसँग मुलपानीमा खेल्दै सुरुवात गर्नेछ । लुम्बिनीले दोस्रो खेल कार्तिक १७ मा पुलिससँग टियु मैदानमा खेल्नेछ । लुम्बिनीले कार्तिक १९ मा मुलपानीमा मधेश प्रदेशसँग खेल्नेछ ।

कार्तिक २० मा टियुमा प्रदेश १ सँग खेल्नेछ । लुम्बिनीले पाँच दिनमा चार खेल खेल्नु पर्ने हुन्छ । लुम्बिनीको युवा टोलीलाई एकदिवसिय खेल्न पक्कै सहज भने हुने छैन । लुम्बिनीको लक्ष्य कम्तिमा सेमिफाइनल हुनेछ ।

लुम्बिनीको टोली :

देव खनाल (कप्तान), बसिर अहमद (उप–कप्तान), प्रज्ज्वल थापा, आकाश त्रिपाठी, मोहम्मद हुसेन, सन्दीप रजाली, विशाल विक्रम केसी, तुलबहादुर थापा, कृष्ण कार्की, दुर्गेश गुप्ता, सुनिल भण्डारी, अनिल खरेल, नरेश नेपाली, अभिषेक गौतम ।

वैकल्पिक खेलाडी : विराट भण्डारी, रोहन केसी, सुमित नेवार र निर्मल गुरुङ ।