एजेन्सी – पाकिस्तानले आइसिसी टि२० विश्वकपमा आज नेदरल्यान्ड्ससँग खेल्दैछ । खेल नेपाली समय अनुसार दिउँसो १२ः ४५ मा पर्थमा सुरुहुनेछ ।

पहिलो खेलमा भारतसँग ४ विकेट र जिम्बावेसँग १ रनले स्तब्ध भएको पाकिस्तान शीर्ष दुईमा रहँदै सेमिफाइनल खेल्ने अंक गणीतिय सम्भावना बाँकी राख्न सबै खेल जित्नुपर्ने हुन्छ । जितले मात्र पुग्ने छैन । अन्य टोलीको नतिजासँगै नेटरनरेटमा भरपर्नेछ ।

पाकिस्तानलाई सेमिफाइनलमा पुग्ने आशा कायमै राख्न नेदरल्यान्ड्समाथि फराकिलो जित निकाल्नु बाहेक अन्य कुनै विकल्प छैन । पाकिस्तानले अव नेदरल्यान्ड्स, बंगलादेश र दक्षिण अफ्रिकासँग खेल्न बाँकी छ । जसमा सबै खेल जित्नुपर्छ ।

उता भारतले दक्षिण अफ्रिका, जिम्बावे र बंगलादेशसँग खेल्न बाँकी छ । भारत र पाकिस्तान दुबैले बाँकी सबै खेल जितेको खण्डमा पाकिस्तान सेमिफाइनलमा पुग्नेछ । भारतले कम्तिमा दक्षिण अफ्रिकालाई हराउँनै पर्छ । दक्षिण अफ्रिका र भारतबीच आज खेल हुँदैछ ।

पाकिस्तानले बलिङमा सानदार प्रदर्शन गरेको छ । ब्याटिङ सुधार गर्नुपर्छ । पाकिस्तानका प्रमुख ब्याटर मोहम्मद रिजवान र बाबर आजम सुरुवाती दुबै खेलमा दोहोरो अंकमा रन बनाउन सकेका छैनन् । त्यसैको कारण पाकिस्तानले खराब प्रदर्शन गरेको छ । जिम्बावेविरुद्ध १ सय ३१ बनाउन नसक्नुमा यी दुई ब्याटर नचल्नु प्रमुख कारण हो ।

पाकिस्तान लामो समयदेखि यी दुई ब्याटरमा निर्भर छ । मध्यक्रम पाकिस्तानको सबैभन्दा ठूलो कमजोरी हो । त्यसैले यी दुई ब्याटरले उच्च प्रदर्शन गर्नुपर्ने हुन्छ । अन्यथा पाकिस्तान नेदरल्यान्ड्सँग स्तब्ध हुन सक्छ ।

हैदर अलीको स्थानमा फखार जमान वा आसिफ अली मध्य एकलाई मौका दिनसक्छ । सुरुवाती दुई खेलमा खराब प्रदर्शन गरेका हैदर बेन्चमा बस्ने सम्भावना उच्च छ । स्पिनर मोहम्मद नवाज र शादब खानबाट ठूलो इनिङ चाहन्छ । जिम्बावेलाई सस्तैमा अल आउट गर्न मोहम्मद वासिम जुनियरले चार विकेट लिँदै सानदार प्रदर्शन गरेका थिए ।

पाकिस्तानको तीव्र गतिको बलिङ आक्रामण उत्कृष्ट छ । शाहिन शाह अफ्रिदी, नसिम शाह, हरिस रौफ र मोहम्मद वासिम जुनियर छन् । चोटबाट फर्किएका अफ्रिदी दुबै खेलमा विकेट विहीन छन् । उनीबाट उत्कृष्ट प्रदर्शन चाहन्छ । अन्य तीन बलरले लगातार उच्च प्रदर्शन गर्दै आएका छन् ।

यता नेदरल्यान्ड्स पाकिस्तानको कमजोर मध्यक्रमको फाइदा उठाउँदै स्तब्ध पार्ने सोचमा हुनेछ । तीव्र गतिका बलर फर्द क्लासेन, पाउल भान मार्केन र बास डि लिडेको जोडी पाकिस्तानलाई निराश बनाउन सक्छ । स्पिनर टिम प्रिन्गल र शरिज अहमद मध्यक्रमका बलर हुन् ।

कप्तान स्कट एडवार्ड्स, विक्रमजित सिंह, म्याक्स ओडाउड, बास डि लिडे, टम कपुर र कोलिन एकरम्यान नेदरल्यान्ड्सका ब्याटर हुन् । म्याक्स ओडाउड र एकरम्यान पाकिस्तानका बलरलाई टाउको दुखाईको ब्याटर बन्न सक्छन् ।

नेदरल्यान्ड्सले पाकिस्तानसँग सन् २००९ को विश्वकप पछि पहिलो पटक खेल्न लागेको हो । उक्त विश्वकपमा पाकिस्तानले नेदरल्यान्ड्सलाई ८२ रनले पराजित गरेको थियो ।

आजको पहिलो खेलमा जिम्बावे र बंगलादेशबीच प्रतिस्पर्धा हुँदैछ । खेल नेपाली समय अनुसार बिहान ८ : ४५ मा द गाब्बा ब्रिसबेनमा हुनेछ । दिउँसो ४: ४५ मा भारत र दक्षिण अफ्रिकाबीच पर्थमा प्रतिस्पर्धा हुनेछ ।

अंक तालिका

सुपर १२ को समूह ए मा न्युजिल्यान्ड ३ खेलमा २ मा जितसहित ५ अंकका साथ शीर्ष स्थानमा छ । इंग्ल्यान्ड ३ खेलमा १ मा जित, १ मा हार र १ खेल रद्ध हुँदा ३ अंकका साथ दोस्रो स्थानमा छ । आयरल्यान्ड ३ खेलमा १ मा जित, १ मा हार र १ खेलमा अंक बाँड्दै तेस्रो स्थानमा छ ।

अष्ट्रेलिया ३ खेलमा १ मा जित, १ मा हार र १ खेलमा अंक बाँड्दै चौथो स्थानमा छ । अफगानिस्तान ३ खेलमा १ मा हार र दुई खेलमा अंक बाँड्दै पाँचौं स्थानमा छ । श्रीलंका ३ खेलमा १ मा जित र ३ मा हार सहित पुछारमा छ ।

सुपर १२ को समूह बी मा भारत २ खेलमा ४ अंकका साथ शीर्ष स्थानमा छ । दक्षिण अफ्रिका २ खेलमा १ मा जित र १ मा अंक बाड्दै ३ अंकका साथ दोस्रो स्थानमा छ ।

जिम्बावे २ खेलमा १ मा जित र १ मा अंक बाँड्दै ३ अंकका साथ तेस्रो स्थानमा छ । बंगलादेश २ खेलमा १ मा जित र १ मा हारसहित चौथो स्थानमा छ । पाकिस्तान र नेदरल्यान्ड्स अंक विहीन हुँदै पुछारमा छन् ।