काठमाडौं (हाम्रो खेलकुद) – कप्तान दीपेन्द्रसिंह ऐरीको शतकसहित उत्कृष्ट अलराउन्ड प्रदर्शनमा नेपाल पुलिस क्लबले प्रधानमन्त्री कप एकदिवसीय राष्ट्रिय प्रतियोगितामा बागमती प्रदेशलाई १ सय ९२ रनको फराकिलो अन्तरले पराजित गरेको छ ।

जितको लागि २ सय ९० रनको विजयी लक्ष्य पछ्याएको बागमती २८ ओभरमा ९७ रनमा अल आउट भयो । बागमतीको लागि ओपनर ईशान पाण्डेले ४७ बलमा २ चौका र १ छक्कासहित सर्वाधिक २४ रन बनाए ।

रामनरेश गिरीले २३ बलमा २ छक्कासहित २२, सोनु देवकोटा २, सूर्य तामाङ ७, नन्दन यादव १०, कप्तान ज्ञानेन्द्र मल्ल ४, रित गौतम र दुर्गेश थापाले एक एक रन बनाए । प्रतिश जि.सीले १४ बलमा २ छक्कासहित १४ रन बनाए ।

पुलिसका दीपेन्द्रसिंह ऐरीले ५ ओभरमा १ मेडनसहित १० रन खर्चेर ३ विकेट लिए । करण केसीले ६ ओभरमा २ मेडनसहित १३ रन खर्चेर २ विकेट लिए । गुलशन झा र सागर ढकालले दुई दुई विकेट लिए ।

त्यसअघि मुलपानी क्रिकेट मैदानमा टस हारेर पहिला ब्याटिङ थालेको पुलिसले निर्धारित ५० ओभरमा ५ विकेट गुमाउँदै २ सय ८९ रन बनाएको थियो । पुलिसका कप्तान दीपेन्द्रले ८२ बलमा ११ चौका र ४ छक्कासहित १ सय ८ रनको सानदार शतकीय इनिङ खेले ।

दीपेन्द्रले ७७ बलमा आफ्नो शतक पूरा गरेका थिए । दीपेन्द्रलाई तीव्र गतिका बलर नन्दन यादवले ४८ औं ओभरको दोस्रो बलमा बोल्ड आउट गरे । त्यसअघिको बलमा दीपेन्द्रले उनलाई छक्का हानेका थिए ।

चौथो विकेटका लागि दीपेन्द्र र आरिफ शेखले १ सय ३६ रनको सानदार शतकीय साझेदारीका साथ विशाल योगफलमा पुर्याए । आरिफले ६८ बलमा १ चौका र १ छक्कासहित ३६ रन बनाए ।

ओपनर सुनिल धमला २३ बलमा ५ चौका र १ छक्कासहित ३७ रन जोड्दै राम्रो सुरुवात दिलाए । कुशल भुर्तेल ७२ बलमा ४ चौकासहित ३७ रनमा आउट भए ।

दीलिप नाथ १२ र पवन सरार्फ १५ रनमा अविजित रहे । बागमतीका नन्दन यादवले १० ओभरमा ७३ रन खर्चेर २ विकेट लिए । रामनरेश गिरीले १० ओभरमा ६३ रन खर्चेर १ विकेट लिए ।

स्पिनर सूर्य तामाङले १० ओभरमा ४ मेडनसहित १४ रन खर्चेर १ विकेट लिए । सोनु देवकोटाले ९ ओभरमा ७४ रन खर्चेर १ विकेट लिए । पुलिसले सोमबार प्रदेश १ सँग मुलपानीमा नै खेल्नेछ । बागमतीले मंगलबार लुम्बिनीसँग खेल्नेछ ।