काठमाडौं (हाम्रो खेलकुद) – नेपाल पुलिस क्लबले प्रधानमन्त्री कप एकदिवसीय राष्ट्रिय प्रतियोगितामा प्रदेश एक माथि ७ विकेटको सहज जित हात पारेको छ । लगातार दोस्रो जितसँगै पुलिस शीर्ष स्थानमा रहँदै सेमिफाइनल नजिक पुगेको छ ।

जितको लागि १ सय ३ रनको सामान्य विजयी लक्ष्य पछ्याएको पुलिसले १४ ओभरमा ३ विकेट गुमाउँदै पूरा गर्यो । पुलिसको जितमा ओपनर कुशल भुर्तेलले २८ बलमा ५ चौका र ३ छक्कासहित सर्वाधिक ४२ रन बनाए ।

शंकर रानाले २४ बलमा ५ चौकासहित २९, दीपेन्द्रसिंह ऐरी १४ र राशिद खानले १६ रन बनाए । ओपनर सुनिल धमला शून्यमा आउट भए । प्रदेश एकका फिर्दोस अन्सारी र सिद्धान्त लोहनीले एक एक विकेट लिए ।

त्यसअघि मुलपानी क्रिकेट मैदानमा टस जितेर पहिला ब्याटिङ थालेको प्रदेश एक ३५.१ ओभरमा १ सय २ रनमा अल आउट भएको थियो । प्रदेश एकले राम्रो सुरुवात गरेपनि ललितनारायण राजवंशीले घातक बलिङ गरेपछि नाटकीय रुपमा पतन भएपछि सस्तैमा अल आउट भएको हो ।

पहिलो विकेटका लागि ओपनर निरज मुखिया र अंकित सुवेदीले ११.१ ओभरमा ५६ रनको साझेदारी गर्दै राम्रो सुरुवात दिलाए । अन्तिम ४६ रन जोड्न प्रदेश एकले आफ्ना सबै विकेट गुमाएको थियो ।

ललितले निरजलाई २९ रनमा बोल्ड गर्दै पुलिसलाई पहिलो सफलता दिलाए । उनले ३७ बलमा ५ चौका प्रहार गरे । अर्का ओपनर अंकितले ३५ बलमा ४ चौकासहित २४ रन बनाए ।

त्यसपछि विकेट पतन नाटकीय रुपमा भयो । सुजन थपलिया शून्य, मिनाश थापा ४, सोनु अन्सारी ६, कप्तान सिद्धान्त लोहनी शून्य, फिर्दोस अन्सारी र श्रवण यादव ९–९ रनमा आउट भए । विवेक आनन्द मेहताले ४६ बलमा १ चौका र १ छक्कासहित १७ रन बनाए ।

पुलिसका ललितनारायण राजवंशीले १० ओभरमा ३ मेडनसहित २६ रन खर्चेर ५ विकेट लिए । सागर ढकाल र दीपेन्द्रसिंह ऐरीले दुई दुई विकेट लिए । राशिद खानले एक एक विकेट लिए ।

पुलिसले पहिलो खेलमा बागमती प्रदेशलाई १ सय ९२ रनले हराएको थियो । अव पुलिसले बिहीबार लुम्बिनीसँग खेल्नेछ । समूह ए मा पुलिस २ खेलमा ४ अंकका साथ शीर्ष स्थानमा छ । प्रदेश एकले मंगलबार टियु मैदानमा बागमतीसँग खेल्नेछ ।