एजेन्सी – धनन्जय डि सिल्भाको अर्धशतकमा श्रीलंकाले आइसिसी टि२० विश्वकपमा अफगानिस्तानमाथि ६ विकेटको सहज जित हात पारेको छ । जारी विश्वकपमा सुपर १२ बाट औपचारिक रुपमा बाहिरिने अफगानिस्तान पहिलो टोली हो ।

जितको लागि १ सय ४५ रनको विजयी लक्ष्य पछ्याएको श्रीलंका १८.३ ओभरमा ४ विकेट गुमाउँदै पूरा गर्यो । श्रीलंकाको जितमा धनन्जय डि सिल्भाले ४२ बलमा ६ चौका र २ छक्कासहित सर्वाधिक ६६ रनमा अविजित रहे ।

ओपनर पाथुम निसांका १०, कुशल मेन्डिस २५, चरिथ असालांका १९ र भानुका राजपक्षे १८ रन बनाए । अफगानिस्तानका मुजिब उर रहमानले ४ ओभरमा २४ रन खर्चेर २ विकेट लिए । राशिद खानले ४ ओभरमा ३१ रन खर्चेर २ विकेट लिए ।

त्यसअघि ब्रिस्बेनमा टस जितेर पहिला ब्याटिङ थालेको अफगानिस्तानले निर्धारित २० ओभरमा ८ विकेट गुमाउँदै १ सय ४४ रन बनायो । अफगानिस्तानका ओपनर रहमानउल्लाह गुरबाज २४ बलमा २ चौका र २ छक्कासहित सर्वाधिक २८ रन बनाए । उस्मान घानीले २७ बलमा २ चौका र १ छक्कासहित २७ रनमा आउट भए ।

पहिलो विकेटका लागि ओपनर गुरबाज र घानीले ६.१ ओभरमा ४२ रनको साझेदारी गर्दै राम्रो सुरुवात दिलाएका थिए । इब्राहिम जद्रानले १८ बलमा १ चौका र १ छक्कासहित २२ र नाजिबउल्लाह जद्रान १८ रनमा आउट भए । मोहम्मद नाबी १३ र राशिद खान ९ रन बनाए ।

श्रीलंकाका स्पिनर वानिन्दु हसरंगाले ४ ओभरमा १३ रन खर्चेर ३ विकेट लिए । लाहिरु कुमाराले ४ ओभरमा ३० रन खर्चेर २ विकेट लिए । कासुन रजिथा र धनन्जय डि सिल्भाले एक एक विकेट लिए ।

सुपर १२ को समूह ए मा अफगानिस्तान ४ खेलमा २ मा हार र २ खेलमा अंक बाँड्दै पुछारमा रहेर बाहिरिएको छ । अफगानिस्तानले अव अन्तिम खेल अष्ट्रेलियासँग खेल्नेछ । श्रीलंकाले अन्तिम खेलमा शनिबार इंग्ल्यान्डसँग खेल्नेछ ।

अंक तालिका

सुपर १२ को समूह ए मा न्युजिल्यान्ड ३ खेलमा २ मा जितसहित ५ अंकका साथ शीर्ष स्थानमा छ । अष्ट्रेलिया ४ खेलमा २ मा जित, १ मा हार र १ खेलमा ५ अंकका साथ नेटरनरेटको कारण दोस्रो स्थानमा छ । श्रीलंका २ मा जित र २ मा हारसहित ४ अंकका साथ तेस्रो स्थानमा छ ।

इंग्ल्यान्ड ३ खेलमा १ मा जित, १ मा हार र १ खेल रद्ध हुँदा ३ अंकका साथ चौथो स्थानमा छ । आयरल्यान्ड ४ खेलमा १ मा जित, २ मा हार र १ खेलमा अंक बाँड्दै पाँचौं स्थानमा छ । अफगानिस्तान ४ खेलमा २ मा हार र दुई खेलमा अंक बाँड्दै पुछारमा छ ।

सुपर १२ को समूह बी मा दक्षिण अफ्रिका ३ खेलमा २ मा जित र १ मा हार सहित ५ अंकका साथ शीर्ष स्थानमा छ । भारत ३ खेलमा २ मा जित र १ मा हारका साथ ४ अंक जोड्दै दोस्रो स्थानमा छ ।

बंगलादेश ३ खेलमा २ मा जित र १ मा हार सहित ४ अंक जोड्दै तेस्रो स्थानमा छ । जिम्बावेले ३ खेलमा १ मा जित र १ मा हार सहित ३ अंकका साथ चौथो स्थानमा छ । पाकिस्तान ३ खेलमा २ मा हार र १ मा जित सहित पाँचौं स्थानमा छ । नेदरल्यान्ड्स तीनै खेलमा पराजित हुँदै पुछारमा छ।