काठमाडौं (हाम्रो खेलकुद) – कप्तान दीपेन्द्रसिंह ऐरीको उत्कृष्ट बलिङमा लुम्बिनी प्रदेशले प्रधानमन्त्री कप एकदिवसीय राष्ट्रिय प्रतियोगितामा नेपाल पुलिस क्लबलाई १ सय ८९ रनको मध्यम लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ थालेको लुम्बिनी प्रदेश ४४.२ ओभरमा १ सय ८८ रनमा अल आउट भयो । लुम्बिनीका लागि कप्तान देव खनालले ८८ बलमा ७ चौका र २ छक्कासहित सर्वाधिक ७४ रन बनाए ।

देवको यो लगातार दोस्रो अर्धशतक हो । देवले पहिलो खेलमा बागमती प्रदेशविरुद्ध ७७ रन बनाएका थिए । विशाल विक्रम केसीले ३८ बलमा ३ चौका र १ छक्कासहित ३० रन बनाए । देव र विशाल बाहेक अन्य कुनैपनि ब्याटरले राम्रो प्रदर्शन गर्न सकेनन् ।

तीव्र गतिका बलर करण केसीले ओपनर आकाश त्रिपाठीलाई पहिलो ओभरको पाँचौं बलमा शून्यमा विकेटकिपर दीलिप नाथबाट क्याच गराए । दोस्रो विकेटका लागि प्रज्वल थापा र देव खनालले ६० रनको साझेदारी गरेका थिए ।

स्पिनर सागर ढकालले प्रज्वललाई २३ रनमा एलबीडब्लू आउट गर्दै साझेदारी तोडेका थिए । उनले ६२ बलमा २ चौका प्रहार गरे । सन्दीप रजाली ७ रनमा दीपेन्द्रको बलमा आउट भए । गुलशन झाको बलमा चोभारतर्फ सट खेलेका देव मिडअनमा सुनिल धमलाबाट क्याच आउट भए ।

त्यसपछि लुम्बिनीले लगातार विकेट गुमायो । बसिर अहमदलाई दीपेन्द्रले ५ रनमा बोल्ड आउट गरे । दीपेन्द्रले कृष्ण कार्कीलाई ९ र अनिल खरेललाई शून्यमा आउट गरे । दुर्गेश गुप्ता र मोहम्मद हुसेनलो ११–११ रन बनाए ।

पुलिसका दीपेन्द्रसिंह ऐरीले १० ओभरमा ५५ रन खर्चेर ४ विकेट लिए । करण केसी ७ ओभरमा २ मेडनसहित १९ रन खर्चेर २ विकेट लिए । सागर ढकालले ७.२ ओभरमा २९ रन खर्चेर २ विकेट लिए । गुलशन झा र ललितनारायण राजवंशीले एक एक विकेट लिए ।