काठमाडौं (हाम्रो खेलकुद) – राष्ट्रिय क्रिकेट टोलीका निलम्बित कप्तान सन्दीप लामिछानेविरुद्ध परेको मुद्दामा जारी थुनछेक बहसअन्तर्गत शुक्रबार जवाफी बहस हुँदैछ । जिल्ला अदालत काठमाडौंमा तीन देखि सन्दीपको थुनछेक बहस जारी छ ।

जिल्ला सरकारी वकिलको कार्यालयले सन्दीपविरुद्ध जिल्ला अदालत काठमाडौँमा दर्ता गराएको बलात्कार मुद्दामा बिहीबार उनको तर्फबाट बहस सकिएको थियो । हेर्दाहेर्दैमा राखिएको मुद्दामा सरकारी पक्षलाई प्रतिवाद गर्ने समय दिइएको छ ।
जवाफी बहस सकिएमा अदालतले सन्दीपलाई पुर्पक्षका लागि थुनामा राख्ने कि धरौटीम रिहा गर्ने आदेश आजै दिने सम्भावना रहेको बताइएको छ ।

सरकारी वकिल कार्यालयले सन्दीपलाई १७ वर्षीया किशोरीलाई बलात्कार गरेको आरोपमा कात्तिक १४ गते मुद्दा दायर गरेको थियो । उनलाई १० देखि १२ वर्षसम्म कैद सजाय माग गरिएको छ । सन्दीप पक्षका बहस गर्नेले किशोरी नाबालिग नरहेको दाबी पेश गरेको बताइएको छ ।

सन्दीपले आफू निर्दोष रहेको र बलात्कार नगरेको बयान दिएका छन् । नाबालिगलाई जबर्जस्ती करणी गरेको आरोपमा जाहेरी परेपछि सन्दीपलाई प्रहरीले असोज २० गते त्रिभुवन अन्तर्राष्ट्रिय विमानस्थलबाट प्रक्राउ गरी हिरासतमा राखेको हो ।