एजेन्सी – इंग्ल्यान्डले आइसिसी टि२० विश्वकपमा आज श्रीलंकासँग खेल्दैछ । खेल नेपाली समय अनुसार दिउँसो १: ४५ मा सिड्नी क्रिकेट ग्राउन्डमा सुरुहुनेछ । इंग्ल्यान्ड आजको खेलमा विजयी हुँदा सेमिफाइनलमा पुग्नेछ ।

यदि इंग्ल्यान्ड पराजित हुँदा अष्ट्रेलिया सेमिफाइनलमा पुग्ने समिकरण छ । सुपर १२ को समूह ए मा न्युजिल्यान्ड सेमिफाइनलमा पुगि सकेको छ ।

न्युजिल्यान्ड ५ खेलमा ७ अंकका साथ सेमिफाइनल यात्रा पक्का गरेको हो । इंग्ल्यान्ड र श्रीलंकाको खेलले समूह विजेता र उपविजेता निर्धारण गर्नेछ । अष्ट्रेलिया ५ खेलमा ७ अंकका साथ दोस्रो स्थानमा छ । इंग्ल्यान्ड ४ खेलमा ५ अंकका साथ तेस्रो स्थानमा छ । अष्ट्रेलियाको नेटरनरेट माइनस ०.१७३ र इंग्ल्यान्डको प्लस ०.५४७ छ ।

इंग्ल्यान्डको ब्याटिङ र बलिङ दुबै उत्कृष्ट छ । ओपनर जस बटलर र एलेक्स हेल्सको प्रदर्शन महत्वपूर्ण हुनेछ । न्युजिल्यान्डले पछिल्लो खेलमा इंग्ल्यान्डसँग २० रनले हारेको थियो । त्यो खेलमा कप्तान जस बटलरले ७३ र एलेक्स हेल्सले ५३ रन जोड्दै राम्रो प्रदर्शन गरेका थिए ।

महत्वपूर्ण खेल अघि यी दुई ब्याटरको लयले इंग्ल्यान्डको मनोबल उच्च छ । इंग्ल्यान्ड उत्कृष्ट सुरुवात चाहन्छ । बटलर चलेको खण्डमा जित सहज हुनेछ । डेविड मलान, बेन स्टोक्स, लियाम लिभिङस्टोन, मोईन अली र साम करन जस्ता विश्वस्तरिय हिटर छन् । यी मध्य दुई खेलाडी चल्दा इंग्ल्यान्डले सहजै विशाल योगफल बनाउन सक्छ । लियाम लिभिङस्टोनको प्रदर्शन महत्वपूर्ण हुनेछ ।

इंग्ल्यान्डको तीव्र गतिको बलिङ आक्रामण मजबुत छ । साम करन, क्रिस वोक्स र मार्क वुड छन् । साम करनले लगातार राम्रो प्रदर्शन गर्दै आएका छन् । मार्क वुडको प्रतिघण्टा १ सय ५५ किलोमिटरको गतिको चाल पाउन श्रीलंका ब्याटरलाई कठिन पर्नेछ । बेन स्टोक्स चौथो विकल्प हुन् । मोईन अली र आदिल राशिद स्पिनर हुन् । तेस्रो पार्ट टाइम स्पिनरमा लियाम लिभिङस्टोन हुनेछन् ।

यता श्रीलंकाका स्पिनर वानिन्दु हसरंगा र महेश थिक्सनाले लगातार राम्रो प्रदर्शन गर्दै आएका छन् । यी दुई स्पिनरबाट श्रीलंका उच्च प्रदर्शन चाहन्छ । कुशल मेन्डिस, धनन्जय डि सिल्भा र भानुका राजपक्षे प्रमुख ब्याटर हुन् । लाहिरु कुमारा, कासुन रजिथा र प्रमोद मधुसान रहनेछन् ।

हेड टु हेड :

इंग्ल्यान्ड र श्रीलंकाबीच हालसम्म १३ टि२० आई खेल भएका छन् । जसमा इंग्ल्यान्ड ९ र श्रीलंका ४ खेलमा विजयी भएका छन् ।