काठमाडौं (हाम्रो खेलकुद) – मधेश प्रदेशले प्रधानमन्त्री कप एकदिवसीय राष्ट्रिय प्रतियोगितामा लुम्बिनी प्रदेशलाई ९२ रनले हराउँदै लगातार दोस्रो जित हात पारेको छ । लगातार दोस्रो जितसँगै मधेशको सेमिफाइनल सम्भावना बलियो बनेको छ ।

जितको लागि २ सय ६० रनको विजयी लक्ष्य पछ्याएको लुम्बिनी ४९.१ ओभरमा १ सय ६७ रनमा अल आउट भयो । लुम्बिनीको लागि विशाल विक्रम केसीले ५१ बलमा २ चौका र २ छक्कासहित सर्वाधिक ३४ रनमा आउट भए ।

ओपनर आकाश त्रिपाठी ८, देव खनाल ९ र प्रज्वल थापा शून्यमा आउट भए । सन्दीप रजाली २७ बलमा ४ चौकासहित २३ र बसिर अहमद १५ रन बनाए ।

कृष्ण कार्कीले तल्लोक्रममा ५४ बलमा ४ चौका र १ छक्कासहित ३१, अनिल खरेल २२ र मोहम्मद हुसेनले १५ रन बनाए । मधेशका लागि राजेश यादवले ८.१ ओभरमा २३ रन खर्चेर ३ विकेट लिए । प्रदीप पासवानले १० ओभरमा २ मेडनसहित २५ रन खर्चेर ३ विकेट लिए । हरिशंकर शाहले १० ओभरमा ५ मेडनसहित २५ रन खर्चेर २ विकेट लिए ।

त्यसअघि मुलपानी क्रिकेट मैदानमा टस हारेर पहिला ब्याटिङ थालेको मधेश ४८.४ ओभरमा २ सय ५९ रनमा अल आउट भयो । मधेशका कप्तान हरिशंकर शाहले ९० बलमा १३ चौका र १ छक्कासहित सर्वाधिक ७६ रन बनाए । ओपनर सन्तोष कार्कीले ६० बलमा ५ चौका र ३ छक्कासहित ५० रनमा आउट भए । विकेटकिपर अनिल शाहले ४९ बलमा ५ चौका र २ छक्कासहित ५० रनमा आउट भए ।

मधेशलाई ओपनर सन्तोष कार्की र हरिशंकर शाहले पहिलो विकेटका लागि २२.१ ओभरमा १ सय ३० रनको सानदार शतकीय साझेदारी गर्दै उत्कृष्ट सुरुवात दिलाएका थिए । देव खनालले सन्तोषलाई सुनिल भण्डारीबाट क्याच गराउँदै साझेदारी तोडे ।

त्यसपछि अनिल खरेलले हरिशंकरलाई एलबीडब्लू आउट गरेपछि लुम्बिनी खेलमा फर्किएको थियो । अनिलको यो लगातार दोस्रो अर्धशतक हो । अनिलले पहिलो खेलमा प्रदेश १ विरुद्ध ६१ रन बनाएका थिए । अनिल यसै सिजनदेखि पुलिस छाडेर घरेलु टोली फर्किएका छन् ।

विवेक यादव ३८ बलमा २ छक्का हान्दै २१ र आदिल आलम १२ रनमा आउट भए । रोहन विक ७ र ईमरान शेखले १० रन बनाए । लुम्बिनी प्रदेशका तीव्र गतिका बलर कृष्ण कार्कीले ८ ओभरमा १ मेडनसहित ३५ रन खर्चेर ३ विकेट लिए ।

अनिल खरेलले ९.४ ओभरमा १ मेडन सहित ३७ रन खर्चेर २ विकेट लिए । मोहम्मद हुसेन, बसिर अहमद र देव खनालले एक एक विकेट लिए । मधेशले पहिलो खेलमा प्रदेश एकलाई ७२ रनले हराएको थियो । मधेशले अव सोमबार बागमती र मंगलबार पुलिससँग टियुमा खेल्नेछ ।

लुम्बिनीले पहिलो खेलमा बागमती प्रदेशलाई ८ विकेटले हराएको थियो । पुलिससँग ६ विकेटले पराजित भएको थियो । लुम्बिनी सेमिफाइनल खेल्न बाँकी दुबै खेलमा मधेश फराकिलो अन्तरले पराजित हुनुपर्छ । मधेशलाई एक जित आवश्यक पर्दछ । लुम्बिनीले आफ्नो अन्तिम खेल आइतबार प्रदेश एकसँग टियुमा खेल्नेछ ।

अंक तालिका

एपिएफ ४ खेलमा ३ मा जित र एक खेलमा टाई हुँदा ७ अंकका साथ शीर्षस्थानमा छ । एपिएफ सेमिफाइनलमा पुगेको छ । गण्डकी ३ खेलमा २ मा जित र एक खेलमा टाई हुँदा ५ अंकका साथ दोस्रो स्थानमा छ । आर्मी २ खेलमा १ मा जित र १ हारका साथ तेस्रो स्थानमा छ । आइतबार गण्डकी र आर्मीबीच खेल हुनेछ । गण्डकी विजयी हुँदा सेमिफाइनलमा पुग्नेछ । कर्णाली २ खेलमा २ खेलमा पराजित भएको छ । सुदूरपश्चिम तीन खेलमा जित विहीन छ ।

समूह बी मा नेपाल पुलिस क्लब ३ खेलमा ६ अंकका साथ शीर्षस्थानमा रहँदै सेमिफाइनलमा पुगेको छ । मधेश २ खेलमा ४ अंकका साथ दोस्रो स्थानमा छ । लुम्बिनी र प्रदेश १ समान ३ खेलमा २ अंकका साथ क्रमश तेस्रो र चौथो स्थानमा छन् । बागमती प्रदेश तीन खेलमा अंक विहीन हुँदै पुछारमा छ ।