एजेन्सी – पाकिस्तानले आइसिसी टि२० विश्वकप २०२२ मा सुपर १२ को अन्तिम खेलमा आज बंगलादेशसँग खेल्दैछ । खेल नेपाली समय अनुसार बिहान ९: ४५ मा एडिलेड ओभलमा सुरुहुनेछ ।

पाकिस्तान सुपर १२ को समूह बी मा ४ खेलमा २ मा जित र २ मा हारसहित तेस्रो स्थानमा छ । आज पाकिस्तान विजयी हुँदा ६ अंक हुनेछ । त्यसैको कारण पाकिस्तान सेमिफाइनलमा पुग्न भारत र दक्षिण अफ्रिका मध्य एकले हार्नुपर्ने हुन्छ ।

दक्षिण अफ्रिकाले नेदरल्यान्ड्सले प्रस्तुत गरेको १ सय ५९ रनको लक्ष्य पछ्याई रहेको छ । आज दिउँसो ४: ४५ मा भारतले जिम्बावेसँग खेल्नेछ । पाकिस्तान पहिला बंगलादेशलाई हराउन चाहन्छ । त्यसपछि भारतको हारको पर्खाईमा बस्नेछ । भारत पराजित हुँदा पाकिस्तान सेमिफाइनलमा पुग्नेछ । अन्यथा जितको बाबजुद बाहिरिनेछ ।

पाकिस्तान पहिलो खेलमा भारतसँग चार विकेट र दोस्रो खेलमा जिम्बावेसँग एक रनले पराजित भएको थियो । पाकिस्तानले त्यसपछि नेदरल्यान्ड्सलाई ६ विकेट र दक्षिण अफ्रिकालाई ३३ रनले पराजित गरेको थियो ।

दक्षिण अफ्रिकालाई हराउन पाकिस्तानले सानदार ब्याटिङ गरेको थियो । शादब खानले २० बलमै अर्धशतक प्रहार गरेका थिए । इफ्तिखार अहमदले पनि अर्धशतक प्रहार गरेका थिए ।

यी दुई खेलाडीको प्रदर्शनले मध्यक्रममा आशा पलाएको छ । तर प्रमुख ब्याटर बाबर आजम र मोेहम्मद रिजवान भने चल्न सकेनन् । यी दुई ब्याटर चल्न नसक्दा पाकिस्तान कमजोर बनेको छ । बंगलादेशविरुद्ध उत्कृष्ट प्रदर्शन चाहन्छ ।

दक्षिण अफ्रिकाविरुद्ध आक्रामक ब्याटिङ गरेका मोहम्मद हरिस आशा लाग्दा क्रिकेटर हुन् । शन मसुद र मोहम्मद नवाजबाट राम्रो प्रदर्शन चाहन्छ । पाकिस्तानको तीव्र गतिको बलिङ आक्रामण मजबुत छ । शाहिन शाह अफ्रिदी, हरिस रौफ, नसिम शाह र मोहम्मद वासिम जुनियर छन् । यी चार बलरको सामु रन जोड्न बंगलादेशका ब्याटरलाई सहज भने हुने छैन ।

यता बंगलादेश अन्तिम खेलमा भारतसँग पाँच रनले पराजित भएको थियो । उक्त खेलमा लिटन दासले विष्फोटक ब्याटिङ गर्दै २७ बलमा ६० रन जोडेका थिए । उनी पाकिस्तानलाई घातक बन्न सक्छन् । मध्यक्रम बंगलादेशको मुख्य समस्या हो । सकिब अल हसन, नुरुल हसन र अफिफ हुसैनले जिम्मेवारीका साथ ब्याटिङ गर्नुपर्ने हुन्छ ।

तस्किन अहमद, मोहम्मद हसन र मुश्ताफिजुर रहमान तीव्र गतिका बलर हुन् । स्पिनरमा सकिब रहनेछन् । बंगलादेश ४ खेलमा २ मा जित र २ मा हारका साथ ४ अंक जोड्दै चौथो स्थानमा छ ।

बंगलादेश सेमिफाइनलमा पुग्न दक्षिण अफ्रिका र भारत मध्य एकले हार्नुपर्छ । सुपर १२ को समूह ए बाट न्यजिल्यान्ड समूह विजेता र इंग्ल्यान्ड उपविजेता हुँदै सेमिफाइनलमा पुगेका छन् ।