एजेन्सी – तीव्र गतिका बलर शाहिन शाह अफ्रिदीको घातक बलिङमा बंगलादेशले आइसिसी टि२० विश्वकपमा पाकिस्तानलाई सेमिफाइनलमा पुग्न १ सय २८ रनको मध्यम लक्ष्य दिएको छ ।

एडिलेड ओभलमा टस जितेर पहिला ब्याटिङ थालेको बंगलादेशले निर्धारित २० ओभरमा ८ विकेट गुमाउँदै १ सय २७ रन बनायो । बंगलादेशका ओपनर नाज्मुल हसन शान्टोले ४८ बलमा ७ चौकासहित सर्वाधिक ५४ रनको योगदान दिए ।

ओपनर लिटन दास ८ बलमा १ छक्कासहित १० रनमा आउट भए । उनी तीव्र गतिका बलर शाहिन शाह अफ्रिदीका बलमा शन मसुदबाट क्याच भए । सौम्य सरकार १७ बलमा १ चौका र १ छक्कासहित २० रनमा क्याच आउट भए ।

स्पिनर शादब खानको बलमा मसुदबाट क्याच भएका थिए । शादब खानले सकिब अल हसनलाई एक रनमा एलबीडब्लू आउट गरे । त्यसपछि शाहिन शाह अफ्रिदीले बंगलादेशको मध्यक्रम धरासयी बनाए । मोसाद्देक हसन ५, नुरुल हसन शून्य र तस्किन अहमदले एक रन बनाए । अफिफ हुसैन २० बलमा ३ चौकासहित २४ रनमा अविजित रहे ।

पाकिस्तानका शाहिन शाह अफ्रिदीले ४ ओभरमा २२ रन खर्चेर ४ विकेट लिए । शादब खानले ४ ओभरमा ३० रन खर्चेर २ विकेट लिए । हरिस रौफ र इफ्तिखार अहमदले एक एक विकेट लिए ।

सुपर १२ को समूह ए बाट न्युजिल्यान्ड शीर्ष र इंग्ल्यान्ड दोस्रो स्थानमा रहँदै सेमिफाइनलमा पुगेका छन् । सुपर १२ को अन्तिम खेलमा जिम्बावे र भारतबीच प्रतिस्पर्धा हुँदैछ । उक्त खेलको नतिजाले समूह विजेता र उपविजेता निर्धारण गर्नेछ ।

दक्षिण अफ्रिका नेदरल्यान्ड्ससँग १३ रनले स्तब्ध भएपछि भारत जिम्बावेसँग खेल्नुअघिनै सेमिफाइनलमा पुगेको हो । पाकिस्तान र बंगलादेशबीचको खेलको विजेता टोली सेमिफाइनलमा पुग्ने समिकरण छ ।