काठमाडौं (हाम्रो खेलकुद) – काठमाडौंमा जारी प्रधानमन्त्री कप एकदिवसीय राष्ट्रिय प्रतियोगितामा लुम्बिनी प्रदेशका कप्तान देव खनाल र प्रदेश नम्बर एकका सिद्धान्त लोहनीले उत्कृष्ट ब्याटिङ गरेका छन् ।

टियु क्रिकेट मैदानमा आइतबार भएको खेलमा लुम्बिनी प्रदेशले प्रदेश एकलाई ३९ रनले हरायो । तर दुबै टोलीका कप्तानले उत्कृष्ट प्रदर्शन गरे । जितको लागि २ सय ९१ रनको बलियो विजयी लक्ष्य पछ्याएको प्रदेश एक ४६ ओभरमा २ सय ५१ रनमा अल आउट भयो ।

कप्तान सिद्धान्त लोहनीले ६० बलमा १० चौका र २ छक्कासहित ७४ रनको उत्कृष्ट इनिङ खेले । सिद्धान्त बसिर अहमदको बलमा एलबीडब्लू आउट भए । प्रदेश एकलाई ओपनर अंकित सुवेदी र निरज मुखियाले १२.३ ओभरमा ८५ रनको साझेदारी गर्दै विष्फोटक सुरुवात दिलाएका थिए ।

अंकित ४८ बलमा १० चौकासहित ५२ रनमा आउट भए । अंकित रन आउट भएका थिए । मुखिया ३७ बलमा १० चौकासहित ४६ रनमा आउट भए । विवेक आनन्द मेहता ७, मिनाश थापा शून्य, फिर्दोस अन्सारी १६, सोनु अन्सारी ३, श्रवण यादव १५ र सोनु मण्डल २० रनमा आउट भए । लुम्बिनी प्रदेशका दुर्गेश गुप्ता, बसिर अहमद र देव खनालले दुई दुई विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको लुम्बिनीले निर्धारित ५० ओभरमा ८ विकेट गुमाउँदै २ सय ९० रन बनायो । लुम्बिनीको लागि ओपनर देव खनालले ९८ बलमा ११ चौकासहित सर्वाधिक ८९ रन बनाए । देव रन आउट भएपछि शतक बनाउन चुकेका थिए ।

आकाश त्रिपाठी ७१ बलमा ४ चौका र १ छक्कासहित ४५ तथा सन्दीप रजालीले ३८ बलमा ४ चौका र १ छक्कासहित ४४ रन बनाए । कृष्ण कार्कीले २३ बलमा ३ चौका र २ छक्कासहित ३१ रनमा आउट भए । विशाल विक्रम केसीले ३६ बलमा ५ चौकासहित ३२ र बसिर अहमद १३ रनमा आउट भए । प्रदेश एकका दीपक जोशीले ९ ओभरमा १ मेडनसहित ५५ रन खर्चेर ४ विकेट लिए । श्रवण यादवले दुई विकेट लिए ।

समूह बी मा लुम्बिनी ४ खेलमा २ मा जित र २ मा हारसहित तेस्रो स्थानमा छ । मधेश प्रदेश २ खेलमा ४ अंकका साथ दोस्रो स्थानमा छ । मधेशले अव बागमती र पुलिससँग खेल्न बाँकी छ ।

यी दुई खेल मध्य एक खेलमा मधेश विजयी हुँदा सेमिफाइनलमा पुग्नेछ । यदि यी दुबै खेलमा झिनो अन्तरले पराजित हुँदा पनि सेमिफाइनलमा पुग्नेछ । भारी अन्तरले हारे भने लुम्बिनी पुग्न सक्छ ।

मधेशको नेटरनरेट प्लस १.६४० छ । लुम्बिनीको माइनस ०.२६५ छ । पुलिस भने ३ खेलमा ६ अंकका साथ सेमिफाइनलमा पुगि सकेको छ । बागमती जित विहीन हुँदै पुछारमा रहेर एक खेल अगावै बाहिरिएको छ । https://www.youtube.com/watch?v=SMwWaw9qgPo