एजेन्सी– आइसिसी टि२० विश्वकप २०२२ को सेमिफाइनल समिकरण पूरा भएको छ । सेमिफाइनलमा भारतले इंग्ल्यान्डसँग खेल्नेछ । पाकिस्तानले न्युजिल्यान्डसँग खेल्नेछ ।

साविक विजेता तथा घरेलु टोली अष्ट्रेलिया सुपर १२ को समूह ए बाट नेटरनरेटको कारण बाहिरिन पर्यो । यस पटक विश्वकपमा ब्याटर भन्दा बलर हाबी बढी भएका छन् ।

यस विश्वकपमा अपेक्षा गरेका थुप्रै स्टार ब्याटर चल्न सकेका छैनन् । रोहित शर्मा, जस बटलर, डेविड वार्नर, आरोन फिन्च, क्विन्टन डि कक, बाबर आजम र मोहम्मद रिजवान जस्ता ठूला आशा गरेका ब्याटर चल्न सकेनन् ।

सर्वाधिक रन बनाउने सूचिमा दोस्रो स्थानमा एसोसियट टोली नेदरल्यान्ड्सका ब्याटर म्याक्स ओडाउड छन् । पहिलो चरणका खेल खेल्ने खेलाडी सर्वाधिक रन बनाउने ब्याटरमा अघि छन् । सेमिफाइनलसम्म टि२० विश्वकप २०२२ मा सर्वाधिक रन बनाउने पाँच ब्याटर यस प्रकार छन् ।

५.सिकन्दर राजा (जिम्बावे)

जिम्बावेका अलराउन्डर सिकन्दर राजा सर्वाधिक रन बनाउने ब्याटरमा शीर्ष पाँचमा छन् । राजाकै उत्कृष्ट प्रदर्शनमा जिम्बावेले सुपर १२ सम्म स्थान बनायो । पाकिस्तानलाई एक रनले स्तब्ध पार्न राजाले सानदार प्रदर्शन गरेका थिए ।

राजाले ८ खेलमा १ सय ४८ बल खेल्दै कुल २ सय १९ रन बनाए । राजाको स्ट्राइकरेट १४७.९७ रहँदा १६ चौका र ११ छक्का हानेका थिए । राजाले पहिलो खेलमै आयरल्यान्डविरुद्ध ४८ बलमा ५ चौका र ५ छक्कासहित ८२ रनको इनिङ खेलेका थिए ।

राजाले वेस्टइन्डिजविरुद्ध १४ रन बनाउनुको साथै तीन विकेट लिएका थिए । स्कटल्यान्डसँग ४०, पाकिस्तानसँग ९, दक्षिण अफ्रिका र जिम्बावेसँग शून्यमा आउट भएका थिए । नेदरल्यान्ड्सविरुद्ध ४० र भारतविरुद्ध ३४ रन बनाए । बलिङतर्फ राजाले १० विकेट लिँदै सानदार अलराउन्ड प्रदर्शन गरे ।

४.कुशल मेन्डिस (श्रीलंका)

श्रीलंकाका ओपनर कुशल मेन्डिस सर्वाधिक रन बनाउने ब्याटरमा चौथो स्थानमा छन् । मेन्डिसले ८ खेलमा १४२.९४ को स्ट्राइकरेटमा १७ चौका र १० छक्का हान्दै कुल २ सय २३ रन बनाए । मेन्डिसले यस प्रतियोगितामा दुई अर्धशतक हाने । कुशल नामिबियासँग ६ रन र युएईसँग १८ रनमा आउट भए ।

त्यसपछि कुशलले नेदरल्यान्ड्विरुद्ध ७९ र आयरल्यान्डविरुद्ध ६८ रन जोडेका थिए । त्यसपछि कुशलले राम्रो प्रदर्शन गर्न सकेनन् । अष्ट्रेलियासँग ५, न्युजिल्यान्डसँग ५, अफगानिस्तानविरुद्ध २५ र इंग्ल्यान्डविरुद्ध १८ रनमा आउट भएका थिए ।

३.सूर्य कुमार यादव (भारत)

भारतीय क्रिकेट टोलीका ब्याटर सूर्य कुमार यादवले यस विश्वकपमा आफ्नो उच्च लयलाई निरन्तरता दिँदै उच्च प्रदर्शन गरेका छन् । भारतलाई सेमिफाइनल सम्म पुर्याउन महत्वपूर्ण प्रदर्शन गरेका सूर्य तेस्रो स्थानमा छन् ।

सूर्यले ५ खेलमा १९३.९६ को स्ट्राइकरेटमा ३ खेलमा अर्धशतक बनाउँदै २ सय २५ रन बनाएका छन् । उनले १ सय १६ बल खेल्दा २५ चौका र ८ छक्का हानेका छन् ।

सूर्य पहिलो खेलमा पाकिस्तानसँग १५ रनमा आउट भएका थिए । दोस्रो खेलमा सूर्यले नेदरल्यान्ड्सविरुद्ध २५ बलमा ७ चौका र १ छक्कासहित ४१ रनमा अविजित रहे । दक्षिण अफ्रिकासँग पराजित भएपनि सूर्यले एकल इनिङ खेल्नेक्रममा ४० बलमा ६ चौका र ३ छक्कासहित ६८ रनको उत्कृष्ट इनिङ खेलेका थिए ।

बंगलादेशसँग ३० रनमा आउट भएका थिए । जिम्बावेसँग सूर्यले २५ बलमा ६ चौका र ४ छक्कासहित ६१ रनको इनिङ खेलेका थिए । भारत उनीबाट सेमिफाइनल हुँदै फाइनलमा उत् कृष्ट प्रदर्शन चाहन्छ ।

२.म्याक्स ओडाउड (नेदरल्यान्ड्स)

नेदरल्यान्ड्सका म्याक्स ओडाउड जारी विश्वकपमा सर्वाधिक रन बनाउने सूचिमा दोस्रो स्थानमा छन् । ओडाउडले ८ खेलमा दुई अर्धशतकसहित कुल २ सय ४२ रन बनाएका छन् । उनले २ सय १५ बल खेल्दा २२ चौका र ८ छक्का हाने । उनको स्ट्राइक रेट ११२.५५ छ । नेदरल्यान्ड्सलाई सुपर १२ सम्म पुयाउँदै अन्तिम आठमा अन्त्य गर्न महत्वपूर्ण रह्यो ।

उनी युएईसँग २३ र नामिबियासँग ३५ रनमा आउट भए । श्रीलंकासँग ५३ बलमा ६ चौका र ३ छक्कासहित ७१ रनमा अविजित रहे । बंगलादेश ८, भारतविरुद्ध १६ र पाकिस्तानसँग ८ रनमा आउट भए । जिम्बावेलाई हराउन उनले ५२ रन बनाएका थिए । दक्षिण अफ्रिकाविरुद्ध २९ रनमा आउट भएका थिए ।

१. विराट कोहली (भारत)

भारतीय क्रिकेट टोलीका ब्याटर विराट कोहली जारी विश्वकपमा सर्वाधिक रन बनाउने ब्याटर हुन् । कोहलीले ५ खेलमा ३ र्अशतकसहित २ सय ४६ रन बनाएका छन् । कुल १ सय ७७ बल खेलेका कोहलीले २१ चौका र ७ छक्का प्रहार गरेका छन् ।

कोहलीले पहिलो खेलमै पाकिस्तानलाई चार विकेटले हराउन ५३ बलमा ६ चौका र ४ छक्कासहित ८२ रनमा अविजित रहँदै सानदार जित दिलाएका थिए । दोस्रो खेलमा नेदरल्यान्ड्सविरुद्ध ४४ बलमा ३ चौका र २ छक्कासहित ६२ रन बनाएका थिए ।
दक्षिण अफ्रिकासँग १२ रनमा आउट हुन पुगे । बंगलादेशविरुद्ध कोहलीले ६४ रन बनाएका थिए । जिम्बावेसँग २६ रनमा आउट भएका थिए ।