एजेन्सी– पाकिस्तान आइसिसी टि२० विश्वकपमा १३ वर्षपछि फाइनलमा पुगेको छ । पाकिस्तानले बुधबार पहिलो सेमिफाइनल खेलमा न्युजिल्यान्डलाई ७ विकेटले हराउँदै १३ वर्षपछि फाइनलमा स्थान बनाएको हो ।

यस विश्वकपमा निकै भाग्यमानी मानिएको पाकिस्तान सन् २००९ को विश्वकपपछि पहिलो पटक फाइनलमा पुगेको हो । पाकिस्तानले २००९ को विश्वकपमा श्रीलंकालाई ८ विकेटले हराउँदै विश्वकप जितेको थियो । त्यसपछि पाकिस्तान फाइनलमा पुग्न सकेको थिएन । पाकिस्तान गतवर्ष टि२० विश्वकप सेमिफाइनलमा अष्ट्रेलियासँग ५ विकेटले पराजित हुँदै बाहिरिएको थियो ।

पहिलो संस्करण २००७ को विश्वकपमा पाकिस्तान फाइनलमा भारतसँग पाँच रनले पराजित भएको थियो । त्यसअघि समूह चरणमा पाकिस्तान बल आउटमा भारतसँग पराजित भएको थियो ।

पाकिस्तानले १९९२ को एकदिवसिय विश्वकप उपाधि जित्दा सेमिफाइनलमा न्युजिल्यान्डलाई नै ४ विकेटले हराउँदै फाइनलमा स्थान बनाएको थियो । २०१० को टि२० विश्वकपको सेमिफाइनलमा पाकिस्तान अष्ट्रेलियासँग तीन विकेटले पराजित हुँदै बाहिरिएको थियो । अन्य टि२० विश्वकपमा पहिलो चरणबाट बाहिरिदै आएको थियो ।

भारतसँग चार विकेट र जिम्बावेसँग एक रनले हारेपछि पाकिस्तानले नेदरल्यान्ड्सलाई ६ विकेट, दक्षिण अफ्रिकालाई ३३ रन र बंगलादेशलाई ५ विकेटले हराउँदै सेमिफाइनलमा स्थान बनाएको थियो । दक्षिण अफ्रिका सेमिफाइनलमा पुग्न जित्नै पर्ने खेलमा नेदरल्यान्ड्सँग १३ पराजित भएपछि सेमिफाइनलमा स्थान बनाएको हो ।

पाकिस्तानले आइसिसी उपाधिको रुपमा अन्तिम पटक २०१७ को च्याम्पियन्स ट्रफी जितेको थियो । पाकिस्तानले फाइनलमा भारतलाई १ सय ८० रनको फराकिलो अन्तरले हराउँदै उपाधि जितेको थियो । पाकिस्तानले उपाधिको लागि आइतबार भारत र इंग्ल्यान्ड मध्य एक टोलीसँग खेल्नेछ । दोस्रो सेमिफाइनल खेलमा बिहीबार भारत र इंग्ल्यान्डबीच प्रतिस्पर्धा हुनेछ । जसको विजेताले पाकिस्तानसँग खेल्नेछ ।

जितको लागि १ सय ५३ रनको विजयी लक्ष्य पछ्याएको पाकिस्तानले १९.१ ओभरमा ३ विकेट गुमाउँदै पूरा गर्यो । पाकिस्तानका विकेटकिपर मोहम्मद रिजवान ४३ बलमा ५ चौकासहित सर्वाधिक ५७ रनमा आउट भए ।

कप्तान बाबर आजम ४२ बलमा ७ चौकासहित ५३ रनमा आउट भए । पहिलो विकेटका लागि बाबर आजम र मोहम्मद रिजवानले १२.४ ओभरमा १ सय ५ रनको शतकीय साझेदारी गर्दै जितको आधार तय गरेका थिए ।

त्यसअघि सिड्नी क्रिकेट मैदानमा टस जितेर पहिला ब्याटिङ रोजेको न्युजिल्यान्डले निर्धारित २० ओभरमा ४ विकेट गुमाउँदै १ सय ५२ रन बनायो । न्युजिल्यान्डका डर्याल मिचेल ३५ बलमा ३ चौका र १ छक्कासहित सर्वाधिक ५३ रनमा अविजित रहे ।