एजेन्सी – आइसिसी टि२० विश्वकपको सेमिफाइनलमा हार बेहोरेपछि न्युजिल्यान्डका कप्तान केन विलियम्सनले पाकिस्तान जितको हकदार रहेको बताएका छन् ।

पाकिस्तानले न्युजिल्यान्डलाई ७ विकेटले हराउँदै फाइनलमा स्थान बनाएको हो । सन् २००९ मा उपाधि जितेपछि पहिलो पटक टि२० विश्वकपको फाइनलमा पुग्ने क्रममा पाकिस्तानले राम्रो प्रदर्शन गर्यो । बलिङमा राम्रो सुरुवात गरेको पाकिस्तानले ब्याटिङमा पनि दुई ओपनरको अर्धशतकिय साथ पाएको थियो ।

खेलपछि बोल्दै कप्तान विलियम्सनले पाकिस्तानले राम्रो प्रदर्शन गरेको बताए । ‘मलाई लाग्छ पाकिस्तानले राम्रो सुरुवात गर्यो । तर बिचमा हामीले मोमेन्टम फिर्ता पाएका थियौं । इनिङ समाप्त हुँदा हामी खेलमा कायम नै थियौं,’ उनले भने ।

‘दोस्रो इनिङमा पाकिस्तानलाई कडा मिहिनेत गर्ने अवस्थामा पुर्याउन सकेनौं । पक्कैपनि यो हार पचाउन कठिन हुन्छ । हाम्रो फिल्डिङ ठिकै थियो, तर अन्य पक्षमा हामीले अझ राम्रो गर्नुपर्ने थियो,’ विलियम्सनले थपे ।

‘मैले अघि पनि भनें, पाकिस्तान जितको हकदार थियो । लिग चरणभर हामीले राम्रो खेल्यौं र आज हामी आफ्नो उच्च प्रदर्शन गर्नबाट चुक्यौं । टि२० क्रिकेटको प्रकृति नै यस्तै हो,’ उनले टुंग्याए ।

पाकिस्तानले अब आइतबार हुने फाइनलमा दोस्रो सेमिफाइनलको विजेतासँग खेल्नेछ । दोस्रो सेमिफाइनलमा विहीबार इंग्ल्यान्ड र भारत भिड्नेछन् ।