काठमाडौं (हाम्रो खेलकुद) – नेपाल एपिएफ क्लबले प्रधानमन्त्री कप एकदिवसीय राष्ट्रिय प्रतियोगिता पहिलो सेमिफाइनल खेलमा मधेश प्रदेशलाई ७ विकेटले हराउँदै तेस्रो पटक फाइनलमा पुगेको छ ।
एपिएफले फाइनलमा उपाधिको लागि दोस्रो सेमिफाइनलको विजेता त्रिभुवन आर्मी क्लब र नेपाल पुलिस क्लब मध्य एकसँग शनिबार प्रतिस्पर्धा गर्नेछ । दोस्रो संस्करणको च्याम्पियन एपिएफ तेस्रो पटक फाइनलमा पुगेको हो । एपिएफ यसअघि दोस्रो र चौथो संस्करणमा फाइनलमा पुगेको थियो ।
जितको लागि १ सय २३ रनको विजयी लक्ष्य पछ्याएको एपिएफले २१.३ ओभरमा ३ विकेट गुमाउँदै पूरा गर्यो । एपिएफको जितमा युवा ब्याटर लोकेश बम ३५ बलमा ४ चौका र १ छक्कासहित सर्वाधिक ३५ रनमा अविजित रहे । सन्दीप जोरा ६ रनमा अविजित रहे ।
ओपनर प्रदीप ऐरी ३८ बलमा ४ चौका र २ छक्कासहित ३३ रनमा आउट भए । अर्का ओपनर आशिफ शेख ३२ बलमा ५ चौकासहित २५ रनमा आउट भए । ओपनर प्रदीप र आसिफ शेखले १० ओभरमा ६० रनको साझेदारी गर्दै राम्रो सुरुवात दिलाएका थिए । तीव्र गतिका बलर राजेश यादवले आसिफलाई बोल्ड गर्दैै पहिलो सफलता दिलाए ।
रुपेश सिंहले प्रदीप ऐरीलाई बोल्ड गरे । सुमित महर्जन २० बलमा २ चौकासहित १३ रनमा क्याच आउट भए । मधेशका रुपेश सिंहले दुई र राजेश यादवले एक विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको मधेश ३१ ओभरमा १ सय २२ रनमा अल आउट भयो । मधेशका लागि रुपेश सिंहले २३ बलमा ४ चौका र २ छक्कासहित सर्वाधिक ३६ रनमा आउट भए । नवौं नम्बरका ब्याटर रुपेश बाहेक अन्य कुनैपनि ब्याटरले राम्रो प्रदर्शन गर्न सकेनन् ।
अन्तिम विकेटका लागि रुपेश र प्रदीप पासवानले २८ रनको साझेदारी गर्दै एक सय रनको आकडा पार गराएका थिए । अन्तिम विकेटका रुपमा प्रदीपलाई कमलसिंह ऐरीले बोल्ड गर्दै अल आउट गरेका थिए । चोभार एण्डबाट आएका तीव्र गतिका बलर कमलसिंह ऐरीले सातौं ओभरको तेस्रो बलमा कप्तान हरिशंकर शाहलाई ६ रनमा बोल्ड गर्दै पहिलो सफलता दिलाए । लगत्तै अर्को बलमा कमलले युवा ब्याटर रोहन विकलाई शून्यमा एलबीडब्लू आउट गरे ।
प्रमुख ब्याटर अनिल कुमार शाहलाई कमलले मौसम ढकालबाट १३ रनमा क्याच गराएपछि मधेश ३०–३ को अवस्थामा पुगेको थियो । स्पिनर भुवन कार्कीले ओपनर सन्तोष कार्कीलाई एलबीडब्लू धरापमा पारे । १६ औं ओभरको चौथो बलमा विशाल शुश्लिङ सट लेगमा सुमित महर्जनबाट एक रनमा क्याच आउट भए । सुमित महर्जनले नै डाइरेक्ट थ्रोमा ईमरान शेखलाई १६ रनमा रन आउट गरे ।
विवेक यादव किशोर महतोको बलमा बोल्ड हुँदै गोल्डेन डक आउट हुन पुगेका थिए । पूर्ण रुपमा फिट नभएका विवेक यस प्रतियोगितामा राम्रो खेल्न सकेका छैनन् । आदिल आलम ३० बलमा १ चौकासहित ११ क्याच आउट भए । राजेश यादवलाई मौसमले १० रनमा बोल्ड गर्दै ८१–८ को दयनीय अवस्थामा पुगेको थियो ।
एपिएफका कमलसिंह ऐरीले ९ ओभरमा १ मेडनसहित २७ रन खर्चेर ४ विकेट लिए । अमरसिंह राउटेलाले ६ ओभरमा १ मेडनसहित १३ रन खर्चेर २ विकेट लिए । मौसम ढकालले ७ ओभरमा ४० रन खर्चेर २ विकेट लिए । दोस्रो सेमिफाइनल खेलमा शुक्रबार नेपाल पुलिस क्लब र त्रिभुवन आर्मी क्लबबीच प्रतिस्पर्धा हुनेछ । फाइनल शनिबार हुनेछ ।
यसअघि फाइनल पुग्ने र विजेता टोलीहरु
पहिलो संस्करणको फाइनल वर्षाको कारण प्रभावित हुँदा उपाधि नेपाल आर्मी र नेपाल पुलिस क्लबले संयुक्त रुपमा उपाधि बाँडेका थिए । दोस्रो संस्करण २०१८ को फाइनलमा एपिएफले आर्मीलाई ६ विकेटले हराउँदै उपाधि जितेको थियो । तेस्रो संस्करण २०१९ मा पुलिसले आर्मीलाई ४ विकेटले हराउँदै च्याम्पियन बनेको थियो ।
चौथो संस्करणको फाइनलमा आर्मीले एपिएफलाई ३३ रनले हराउँदै उपाधि जितेको थियो । गतवर्ष नेपालले टि२० विश्वकप ग्लोबल छनोट ए खेल्ने भएपछि प्रधानमन्त्री कप एकदिवसियको सट्टा क्यानले टि२० शैलीमा गरेको थियो । गतवर्ष टि२० राष्ट्रिय प्रतियोगिता उपाधि एपिएफले पुलिसलाई २१ रनले हराउँदै उपाधि जितेको थियो ।
