एजेन्सी – भारतले आइसिसी टि२० विश्वकप २०२२ को दोस्रो सेमिफाइनल इंग्ल्यान्डसँग १० विकेटको लज्जास्पद हार बेहोर्दा तीन विश्व कीर्तिमान बनेका छन् । जितको लागि १ सय ६९ रनको विजयी लक्ष्य पछ्याएको इंग्ल्यान्डले १६ ओभरमा कुनै विकेट नगुमाइ पूरा गर्यो ।

इंग्ल्यान्डको जितमा ओपनर एलेक्स हेल्स ४७ बलमा ४ चौका र ७ छक्कासहित ८६ रनमा अविजित रहे । कप्तान जस बटलर ४९ बलमा ९ चौका र ३ छक्कासहित ८० रनमा अविजित रहे । जस बटलरले विजयी छक्का हान्दै फाइनलमा स्थान पक्का गराए ।

त्यसअघि एडिलेड ओभलमा टस हारेर पहिला ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १ सय ६८ रन बनाएको थियो । भारतका हार्दिक पान्ड्याले ३३ बलमा ४ चौका र ५ छक्कासहित सर्वाधिक ६३ रन बनाए । इंग्ल्यान्डका क्रिस जोर्डनले तीन विकेट लिए ।

उपाधिको लागि पाकिस्तान र इंग्ल्यान्डबीच प्रतिस्पर्धा हुनेछ । पाकिस्तानले पहिलो सेमिफाइनल खेलमा न्युजिल्यान्डलाई ७ विकेटले हराएको थियो । फाइनल आइतबार मेलबर्न क्रिकेट ग्राउन्डमा सुरु हुनेछ । भारतको लज्जास्पद हारमा बनेका तीन विश्व कीर्तिमान यस प्रकार छन् ।

३. कुनै विकेट नगुमाई पूरा भएको ठूलो योगफल

विश्वकप इतिहासमा यो कुनै विकेट नगुमाई पूरा भएको सर्वाधिक ठूलो योगफल हो । यसअघि गतवर्ष विश्वकपमा पाकिस्तानले भारतविरुद्ध १ सय ५२ रनको लक्ष्य कुनै विकेट नगुमाई पूरा गरेको थियो । त्यो नै विकेट नगुमाई पूरा गरेको सर्वाधिक ठूलो योगफल थियो ।

२. विश्वकपमा सर्वाधिक ठूलो साझेदारी

भारतलाई १० विकेटले हराउन ओपनर जस बटलर र एलेक्स हेल्सले १ सय ७० रनको अविजित साझेदारी गरे । टि२० विश्वकप इतिहासा यो कुनैपनि विकेटका लागि भएको उच्च साझेदारी हो ।

यसअघि यसै विश्वकपको सुपर १२ को समूह बी मा दक्षिण अफ्रिकाका क्विन्टन डि कक र राइली रोसोले बंगलादेशविरुद्ध दोस्रो विकेटका लागि १ सय ६८ रनको साझेदारी गरेका थिए ।

त्यो नै सबैभन्दा ठूलो साझेदारी थियो । त्यसपघि श्रीलंकाका कुमार संगाकारा र महेला जयवर्धनेले २०१० मा दोस्रो विकेटका लागि वेस्टइन्डिजविरुद्ध १ सय ६६ रनको साझेदारी गरेका थिए ।

१. विश्वकपमा १० विकेटले दुई पटक हार्ने पहिलो टोली

भारत टि२० विश्वकपमा १० विकेटले दुई पटक पराजित हुने पहिलो टोली बन्न पुगेको छ । भारत गतवर्ष विश्वकपमा पाकिस्तानसँग १० विकेटले पराजित भएको थियो ।

१ सय ५२ रनको विजयी लक्ष्य पाकिस्तानले १७.५ ओभरमा कुनै विकेट नगुमाई पूरा गरेको थियो । उक्त खेलमा बाबर आजम ६८ र मोहम्मद रिजवान ७९ रनमा अविजित थिए ।

विश्वकप इतिहासमा यो मात्रै पाँचौं पटक १० विकेटको हार हो । सबै भन्दा पहिला २००७ को विश्वकपमा अष्ट्रेलियाले २००७ को विश्वकपमा १०२ रनको लक्ष्य १०.२ ओभरमा पूरा गर्दै श्रीलंकालाई १० विकेटले हराएको थियो ।

दक्षिण अफ्रिकाले २०१२ को विश्वकपमा जिम्बावेले दिएको ९४ रनको लक्ष्य १२.४ ओभरमा पूरा गरेको थियो । गतवर्ष विश्वकपमा ओमानले पपुवा न्युगिनीलाई १० विकेटले हराएको थियो । उक्त खेलमा ओमानले १ सय ३० रनको लक्ष्य १३.४ ओभरमा पूरा गरेको थियो ।