काठमाडौं (हाम्रो खेलकुद) – नेपाली महिला क्रिकेट टोलीकी स्टार अलराउन्डर सीता रानामगरले दोस्रो संस्करणको फेयर ब्रेक इन्भिटेसनल टि२० क्रिकेट प्रतियोगिता खेल्ने भएकी छिन् ।

हङकङमा २०२३ अप्रिलमा आयोजना हुने दोस्रो संस्करणको फेयर ब्रेकमा रिटेन (अनुबन्ध) गरेको सीताले पक्का गरेकी छिन् । गतवर्ष फेयर ब्रेकमा सीताले टोर्नाडोस वुमेन्सबाट खेल्दै राम्रो प्रदर्शन गरेकी थिइन् ।

सीता सम्मिलित टोर्नाडोसले गत वर्ष दुबईमा भएको फाइनलमा फाल्कोन्स वुमन्सलाई ८ विकेटले हराउँदै टोर्नाडोस च्याम्पियन बनेको हो ।

त्यस प्रतियोगितामा सीताले ७ खेलमा ४ विकेट लिँदा २२ रन बनाएकी थिइन् । त्यस समय सीताले गरेको ‘पुष्पा’ सेलेब्रेसनले पनि निकै चर्चा पाएको थियो । सीताले आफूलाई रिटेन गरेको पक्का भएको बताइन् ।

टोली त्यहिँ वा फरक त्यो भने पक्का नभएको सीताले जानकारी दिइन् । उक्त प्रतियोगितामा नेपाली महिला क्रिकेट टोलीकी कप्तान रुविना क्षेत्री बेलबासेले ब्यारी आर्मी वुमेन्सबाट खेलेकी थिइन् ।

प्रतियोगिता आगमी अप्रिल ३ देखि १६ अप्रिल सम्म हुनेछ । सीताले नेपालबाट ३० महिला टि२० आई खेलमा ५ सय ७ रन बनाउनुको साथै ३१ विकेट लिएकी छिन् ।

सीता नेपाली महिला क्रिकेटमा एकै इनिङमा सर्वाधिक रन बनाउने ब्याटर हुन् । गत नोभेम्बरमा सीताले कतारविरुद्ध ८२ रनको अविजित इनिङ खेलेकी थिइन् ।