एजेन्सी – आइसिसी टि२० विश्वकप २०२२ को फाइनलमा आज पाकिस्तान र इंग्ल्यान्डबीच प्रतिस्पर्धा हुँदैछ । खेल नेपाली समय अनुसार दिउँसो १: ४५ मा अष्ट्रेलियाको मेलबर्न क्रिकेट ग्राउन्डमा सुरु हुनेछ । बाबर आजमको नेतृत्वमा रहेको पाकिस्तान र जस बटलरको नेतृत्वमा भएको इंग्ल्यान्ड दोस्रो पटक टि२० विश्वकप जित्ने सोचमा छन् ।

तर आज फाइनलको समयमा मौसम पूर्वअनुमानको अनुसार मेलबर्नमा शतप्रतिशत वर्षाको सम्भावना छ । यदि खेल वर्षा भएको अवस्थामा नतिजा निकाल्न दुवै टोलीले कम्तिमा १० ओभर खेल्नुपर्छ । आइसिसीको नियम अनुसार नक आउट चरणका खेलमा डकवर्थ लेविस पद्धतिको आधारमा नतिजा निकाल्न दोस्रो ब्याटिङ गर्ने टोलीले कम्तिमा १० ओभरको समीकरण पाउनुपर्छ ।

यदि आज फाइनल हुन नसकेको खण्डमा खेल सोमबारलाई स्थगित हुनेछ । आज ओभर घटाएर खेल गराउन हरसम्भव प्रयास हुनेछ । आइतबार न्यूनतम १० ओभर पनि बलिङ गर्न नसके सोमबार खेल सुरुदेखि हुनेछ । तर आइतबार खेल सुरु भएर बीचमा रोकिएमा सोमबार त्यहिँ अवस्थाबाट सुरु हुनेछ । जहाँ खेल रोकिएको थियो त्यहि अवस्थाबाट सोमबार सुरु गर्नुपर्छ ।

आइतबार खेलमा कट अफ टाइम भन्दा ९० मिनेट अतिरिक्त थपिने छ । सोमबार भने चार घण्टा अतिरिक्त समय थपिने छ । यदि खेल टाई हुँदा सुपर ओभर हुनेछ । सुपर ओभर टाइ हुँदा अर्को सुपर ओभर हुनेछ । तर वर्षाको कारण सुपर ओभर हुन नसके दुवै टोलीले उपाधि बाँड्नुपर्ने हुन्छ । सोमबार पनि खेल हुन नसके संयुक्त रुपमा विजेता बन्नुपर्ने हुन्छ ।

इंग्ल्यान्डले दोस्रो सेमिफाइनल खेलमा भारतलाई १० विकेटले हराउँदै फाइनलमा पुगेको हो । पहिलो सेमिफाइनल खेलमा न्युजिल्यान्डलाई ७ विकेटले हराउँदै पाकिस्तानले फाइनलमा स्थान बनाएको थियो ।

अघिल्लो महिनामात्रै पाकिस्तान र इंग्ल्यान्डबीच सर्वाधिक धेरै खेलको टि२० आई सिरिज भएको थियो । पाकिस्तानमा भएको सात टि२० आई खेलको सिरिज इंग्ल्यान्डले ४–३ ले जितेको थियो ।

पाकिस्तानले सन् २००९ को फाइनलमा पाकिस्तानले श्रीलंकालाई ८ विकेटले हराउँदै उपाधि जितेको थियो । त्यसअघि पहिलो संस्करण २००७ को पाकिस्तान भारतसँग फाइनलमा पाँच रनले पराजित भएको थियो । पाकिस्तान १३ वर्षपछि फाइनलमा स्थान बनाएको हो । यता इंग्ल्यान्डले २०१० को फाइनलमा अष्ट्रेलियालाई ७ विकेटले हराउँदै उपाधि जितेको थियो ।

२०१६ को टि२० विश्वकपमा इंग्ल्यान्ड वेस्टइन्डिजसँग चार विकेटले पराजित भएको थियो । अन्तिम ६ बलमा १९ रन चाहिँदा वेस्टइन्डिजका कार्लोस व्रेथवेटले बेन स्टोक्सलाई लगातार चार छक्का हान्दै अविश्वसनिय उपाधि जिताएका थिए । फाइनलमा इंग्ल्यान्ड र पाकिस्तानबीच ३० वर्षपछि प्रतिस्पर्धा हुन लागेको हो । सन् १९९२ को एकदिवसीय विश्वकपमा पाकिस्तानले इंग्ल्यान्डलाई २२ रनले हराउँदै उपाधि जितेको थियो ।