एजेन्सी – आइसिसी टि२० विश्वकप २०२२ को फाइनल खेलमा आज पाकिस्तान र इंग्ल्यान्डबीच प्रतिस्पर्धा हुँदैछ । खेल नेपाली समय अनुसार दिउँसो १:४५ मा मेलबर्न क्रिकेट ग्राउन्डमा सुरु हुनेछ ।

इंग्ल्यान्डले सेमिफाइनलमा भारतलाई १० विकेटले तथा पाकिस्तानले न्युजिल्यान्डलाई ७ विकेटले हराउँदै फाइनलमा स्थान बनाएका हुन् । इंग्ल्यान्ड र पाकिस्तानबीच फाइनलमा सन् १९९२ को एकदिवसीय विश्वकपपछि पहिलो पटक प्रतिस्पर्धा गर्न लागेका हुन् ।

१९९२ मा पास्कितानले इंग्ल्यान्डलाई २२ रनले हराउँदै उपाधि जितेको थियो । त्यस पटक विश्वकप जित्दाका लगभग सबै संयोग यस पटक दोहोरिएका छन् । त्यसपछि पाकिस्तानले एकदिवसीय विश्वकपमा फाइनलमा स्थान बनाउन सकेको छैन ।

इंग्ल्यान्डले २०१९ मा न्युजिल्यान्डलाई सुपर ओभर टाइ भएपछि बाउन्ड्री बढी प्रहारको आधारमा उपाधि जितेको थियो ।
पाकिस्तान २००९ को टि२० विश्वकप च्याम्पियन टोली हो । उक्त विश्वकप फाइनलमा श्रीलंकालाई ८ विकेटले हराउँदै उपाधि जितेको थियो । २००७ टि२० विश्वकप फाइनलमा पाकिस्तान भारतसँग ५ रनले पराजित भएको थियो ।

इंग्ल्यान्डले सन् २०१० को टि२० विश्वकप फाइनलमा अष्ट्रेलियालाई ७ विकेटले हराउँदै उपाधि जितेको थियो । इंग्ल्यान्ड २०१६ को टि२० विश्वकप फाइनलमा वेस्टइन्डिजसँग ४ विकेटले पराजित भएको थियो ।

त्यसपछि टि२० विश्वकपमा यी दुई टोली फाइनलमा पुग्न सकेका थिएनन् । त्यस्तै एकदिवसीय विश्वकपमा इंग्ल्यान्ड २०१९ मा फाइनलमा पुगेको थियो । पाकिस्तान १९९३ पछि फाइनलमा पुग्न सकेको छैन ।

यता च्याम्पियन्स ट्रफीमा पाकिस्तानले भारतलाई २०१७ मा १ सय ८० रनको फराकिलो अन्तरले हराउँदै उपाधि जितेको थियो । त्यसअघि पाकिस्तान च्याम्पियन्स ट्रफीको फाइनलमा पुग्न सकेको थिएन । त्यसपछि च्याम्पियन्स ट्रफी आयोजना भएको छैन । इंग्ल्यान्ड च्याम्पियन्स ट्रफी २००४ को फाइनलमा वेस्टइन्डिजसँग दुई विकेट र २०१३ मा भारतसँग पाँच रनले पराजित भएको थियो ।

गतवर्ष पहिलो पटक भएको आइसिसी विश्व टेस्ट च्याम्पियनसिपको फाइनलमा भारत र न्युजिल्यान्डबीच प्रतिस्पर्धा भएको थियो । आइसिसीले आयोजना गर्ने यी चार प्रतियोगितानै प्रमुख हुन् । त्यसैले इंग्ल्यान्ड र पाकिस्तानबीच आइसिसीको प्रमुख प्रतियोगितामा ३० वर्षपछि फाइनलमा प्रतिस्पर्धा हुन लागेको हो ।