एजेन्सी – आइसिसी टि२० विश्वकप २०२२ को फाइनलमा इंग्ल्यान्डले पाकिस्तानविरुद्ध टस जितेर पहिला फिल्डिङ गर्ने निर्णय लिएको छ । अष्ट्रेलियाको मेलबर्न क्रिकेट ग्राउन्डमा भएको टसमा इंग्ल्यान्डका कप्तान जस बटलरले जितेर पहिला फिल्डिङ गर्ने निर्णय लिएका हुन् ।

इंग्ल्यान्ड र पाकिस्तान दुबैले आजको खेलमा कुनै परिवर्तन गरेका छैनन् । इंग्ल्यान्डले दोस्रो सेमिफाइनल खेलमा भारतलाई १० विकेटले हराउँदै फाइनलमा पाकिस्तानसँग भेट पक्का गरेको हो । पहिलो सेमिफाइनल खेलमा न्युजिल्यान्डलाई ७ विकेटले हराउँदै पाकिस्तानले फाइनलमा स्थान बनाएको थियो ।

अघिल्लो महिनामात्रै पाकिस्तान र इंग्ल्यान्डबीच सर्वाधिक धेरै खेलको टि२० आई सिरिज भएको थियो । पाकिस्तानमा भएको सात टि२० आई खेलको सिरिज इंग्ल्यान्डले ४–३ ले जितेको थियो ।

पाकिस्तानले सन् २००९ को फाइनलमा पाकिस्तानले श्रीलंकालाई ८ विकेटले हराउँदै उपाधि जितेको थियो । त्यसअघि पहिलो संस्करण २००७ को पाकिस्तान भारतसँग फाइनलमा पाँच रनले पराजित भएको थियो । पाकिस्तान १३ वर्षपछि फाइनलमा स्थान बनाएको हो । यता इंग्ल्यान्डले २०१० को फाइनलमा अष्ट्रेलियालाई ७ विकेटले हराउँदै उपाधि जितेको थियो ।

२०१६ को टि२० विश्वकपमा इंग्ल्यान्ड वेस्टइन्डिजसँग चार विकेटले पराजित भएको थियो । अन्तिम ६ बलमा १९ रन चाहिँदा वेस्टइन्डिजका कार्लोस व्रेथवेटले बेन स्टोक्सलाई लगातार चार छक्का हान्दै अविश्वसनिय उपाधि जिताएका थिए ।

फाइनलमा इंग्ल्यान्ड र पाकिस्तानबीच ३० वर्षपछि प्रतिस्पर्धा हुन लागेको हो । सन् १९९२ को एकदिवसीय विश्वकपमा पाकिस्तानले इंग्ल्यान्डलाई २२ रनले हराउँदै उपाधि जितेको थियो । त्यस समयका सबै जसो संयोग पाकिस्तानको लागि दोखोरिएका छन् ।

यस विश्वकपमा इंग्ल्यान्ड र पाकिस्तान दुबै उप–विजेता टोली हुन् । इंग्ल्यान्ड सुपर १२ को समूह ए को उपविजेता टोली हो । इंग्ल्यान्ड वर्षाको कारण आयरल्यान्डसँग डकवर्थ लेविस पद्धतिको आधारमा पाँच रनले स्तब्ध भएको थियो । अफगानिस्तानलाई पाँच विकेट, न्युजिल्यान्डलाई २० रन र श्रीलंकालाई ४ विकेटले हराएको थियो ।

अष्ट्रेलियासँग वर्षाको कारण अंक बाँडेको थियो । यता पाकिस्तान पहिलो खेलमा भारतसँग चार विकेट र जिम्बावेसँग एक रनले पराजित भएको थियो । त्यसपछि नेदरल्यान्ड्सलाई ६ विकेट, दक्षिण अफ्रिकालाई ३३ रन र बंगलादेशलाई ५ विकेटले हराएको थियो । अन्तिम खेलमा दक्षिण अफ्रिका नेदरल्यान्ड्ससँग १३ रनले पराजित भएपछि पाकिस्तान सेमिफाइनलमा पुगेको हो ।

पाकिस्तानको तीव्र गतिको बलिङ आक्रामण र इंल्यान्डको ब्याटिङ मजबुत छ । उता एलेक्स हेल्स र जस बटलर जस्ता विष्फोटक ब्याटर हुँदा यता शाहिन शाह अफ्रिदी र हरि रौफ जस्ता तीव्र गतिका बलर छन् ।

इंग्ल्यान्डको प्लेइङ ११ :

जस बटलर(कप्तान), एलेक्स हेल्स, फिलिप साल्ट, बेन स्टोक्स, ह्यारी ब्रुक, लियाम लिभिङस्टोन, मोईन अली, साम करन, क्रिस जोर्डन, क्रिस वोक्स र आदिल राशिद ।

पाकिस्तानको प्लेइङ ११ :

मोहम्मद रिजवान (विकेटकिपर), बाबर आजम (कप्तान), मोहम्मद हरिस, शन मसुद, इफ्तिखार अहमद, शादब खान, मोहम्मद नवाज, मोहम्मद वासिम जुनियर, नसिम शाह, हरिस रौफ र शाहिन शाह अफ्रिदी ।

हेड टु हेड :

इंग्ल्यान्ड र पाकिस्तानबीच हालसम्म २८ टि२० आई खेल भएका छन् । जसमा इंग्ल्यान्ड १८ र पाकिस्तान ९ खेलमा विजयी भएका छन् ।