काठमाडौं (हाम्रो खेलकुद) – युवा ब्याटर दीपक बोहाराले वाई वाई यू-१९ राष्ट्रिय प्रतियोगिता अन्तर्गत सुदूरपश्चिम प्रदेश छनोटमा चौका र छक्काको वर्षा गराउँदै सानदार शतक हानेका छन् ।

दीपककले डडेलधुराबाट बैतडीलाई ९२ रनले हराउन सानदार शतक हानेका हुन् । टस जितेर पहिला ब्याटिङ थालेको डडेलधुरा ३९.४ ओभरमा २ सय ४० रनमा अल आउट भयो । कप्तान दीपक बोहाराले १ सय ४ बलमा १८ चौका र १० छक्कासहित १ सय ६१ रनको विष्फोटक शतकीय इनिङ खेले ।

सचिन साउद ३५ बलमा ४ चौकासहित ४ चौकासहित ३६ रनमा आउट भए । कृष्ण भट्टले १३ रन बनाए । अन्य कुनैपनि ब्याटरले दोहोरो अंकमा रन बनाउन सकेनन् । बैतडीका विरेन्द्र चन्दले ८ ओभरमा ५३ रन खर्चेर ६ विकेट लिए । जितको लागि २ सय ४१ रनको विजयी लक्ष्य पछ्याएको बैतडी ३४.१ ओभरमा १ सय ४८ रनमा अल आउट भयो । प्रदीप साउदले ३५ बलमा ५ चौकासहित ३५ रन बनाए । ओपनर दीपक बोहारा २८, नरेन भट्ट २१ र डंमर तिरुवाले २२ रन बनाए ।

डडेलधुराका कैलाश ऐर र कृष्ण विष्टले दुई दुई विकेट लिए । सचिन मल्लले सर्वाधिक तीन विकेट लिए । सबै प्रदेशले अहिले यू१९ छनोटको तयारी गरेका छन् । मंसिर दोस्रो साता काठमाडौंमा यू–१९ राष्ट्रिय प्रतियोगिता आयोजना हुनेछ । जसबाट नेपालको यू१९ टोली निर्माण गर्दै विश्वकप छनोट खेल्नेछ ।

बायाँ हाते ब्याटर तथा स्पिनर दीपकले प्रधानमन्त्री कप प्रतियोगिता पछिल्ला दुई संस्करण नेपाल एपिएफ क्लबबाट खेलेका छन् । शनिबार एपिएफले आर्मीलाई हराउँदै उपाधि जितेको थियो । तर दीपक बोहरा हिजोनै धनगढी लागेका थिए । गतवर्ष यू१९ राष्ट्रिय प्रतियोगितामा बागमती प्रदेशबाट छनोट खेलेपनि स्थान बनाउन सकेका थिएनन् ।

दीपकले नेपालको यू-१६ टोलीबाट खेल्दै राम्रो प्रभाव छाडि सकेका छन् । सन् २०१९ को अप्रिलमा नेपालले थाईल्यान्डमा एसिसी इस्र्टन रिजनको उपाधि जित्दा दीपकको योगदान महत्वपूर्ण थियो । उनले ५ खेलमा ९१ रन बनाएका थिए । फाइनलमा हङकङलाई ५९ रनले हराउन तीन विकेट लिँदै प्लेयर अफ द फाइनल चुनिएका थिए ।

अघिल्लो महिना सम्पन्न यू–१९ राष्ट्रिय प्रतियोगितामा काठमाडौं जिल्लाबाट छनोट खेलेपनि बागमतीको टोलीमा स्थान बनाउन सकेका थिएनन् । यू१९ टोलीमा नपरेपछि उनी बारामा सम्पन्न हरपुर क्रिकेट च्याम्पियन्स ट्रफी एपिएफबाट खेलेका थिए । एपिएफलाई उपाधि जिताउन दीपकले अलराउन्ड प्रदर्शन गर्दै राम्रो छाप छाडेपछि प्रधानमन्त्री कपमा स्थान बनाएका हुन् ।