एजेन्सी – पाकिस्तान आइसिसी टि२० विश्वकप २०२२ को फाइनलमा इंग्ल्यान्डसँग ५ विकेटले पराजित हुँदै च्याम्पियन बन्नबाट चुकेको छ । १३ वर्षपछि उपाधि जित्ने सपना पुन असफल भएको छ ।

जितको लागि १ सय ३८ रनको विजयी लक्ष्य पछ्याएको इंग्ल्यान्डले १९ ओभरमा ५ विकेट गुमाउँदै पूरा गर्यो । इंग्ल्यान्डको जितमा बेन स्टोक्सले ४९ बलमा ५ चौका र १ छक्कासहित सर्वाधिक ५२ रनमा अविजित रहे । पाकिस्तानका हरिस रौफले ४ ओभरमा २३ रन खर्चेर २ विकेट लिए ।

त्यसअघि मेलबर्न क्रिकेट ग्राउन्डमा टस हारेर पहिला ब्याटिङ थालेको पाकिस्तानले निर्धारित २० ओभरमा ८ विकेट गुमाउँदै १ सय ३७ रन बनाएको थियो । पाकिस्तानका शान मसुदले २८ बलमा २ चौका र १ छक्कासहित सर्वाधिक ३८ रन बनाए । शादब खानले १४ बलमा २ चौकासहित २० रन जोडे ।

इंग्ल्यान्डका साम करनले ४ ओभरमा मात्रै १२ रन खर्चेर ३ विकेट लिए । स्पिनर आदिल राशिदले ४ ओभरमा १ मेडनसहित २२ रन खर्चेर २ विकेट लिए ।

विश्वकपकै सर्वाधिक मजबुत ब्याटिङ भएको इंग्ल्यान्ड र उत्कृष्ट तीव्र गतिको बलिङ आक्रामण भएको पाकिस्तानबीचको प्रतिस्पर्धा कडा हुने अनुमान गरिएको थियो । तर सोचे अनुसार हुन सकेन । पाकिस्तानले फाइनलमा इंग्ल्यान्डसँग हार्दै उपाधि जित्न नसक्नुको प्रमुख पाँच कारण यस प्रकार छन् ।

५.ठूलो इनिङको अभाव र कमजोर ब्याटिङ

पाकिस्तानको तर्फबाट कुनैपनि ब्याटरले ठूलो इनिङ खेल्न सकेनन् । पहिला ब्याटिङ गर्ने टोलीलाई विशाल योगफलमा पुर्याउन कम्तिमा एक ब्याटरले एउटा एण्ड राम्रोसँग सम्हाल्दै ठूलो इनिङ खेलेको हुनुपर्छ । जसको कारण अन्य ब्याटर र नयाँ आउने खेलाडी दबाब कम हुन्छ । बलर दबाबमा पर्ने गर्दछन् ।

पाकिस्तानबाट यस खेलमा सर्वाधिक रन शान मसुदले ३८ र बाबर आजमले ३२ रन बनाए । यो प्रदर्शनले संसारको कुनैपनि टोलीले ठूलो योगफल बनाउन सक्दैन । ब्याटिङ नै प्रमुख खबी भएको इंग्ल्यान्डलाई हराउँदै धेरै कठिन पर्छ । पाकिस्तानको कमजोर ब्याटिङ गर्नुको मुख्य कारण नै खराब सट छनोट थियो ।

पाकिस्तानी ब्याटरले बाउन्ड्रीमा जोखिम लिन सकेन । टि२० क्रिकेटमा बाउन्ड्री विना ठूलो योगफल कहिल्यै बन्न सक्दैन । पाकिस्तानले आज मात्रै ८ चौका र २ छक्का प्रहार गर्यो । बाउन्ड्री प्रहारले योगफल बलियो मात्र होईन ब्याटरमा आत्माविश्वास झनै बढ्छ । बलर दबाबमा पर्ने गर्दछ । इंग्ल्यान्डको तर्फबाट बेन स्टोक्सले ५२ रन बनाउँदै खेल सकाए । १४ औं र २ छक्का प्रहार भएको थियो ।

४.बेन स्टोक्सको परिपक्क प्रदर्शन

योगफल मध्यम भएपनि पाकिस्तानले आफ्नो बलिङ क्षमता अनुसार सानदार प्रदर्शन गर्यो । सुरुवातको पहिलो ओभरमै एलेक्स हेल्स शाहिन शाह अफ्रिदीको बलमा बोल्ड आउट भए । एक समय इंग्ल्यान्ड ४५–३ थियो ।

त्यो अवस्थामा थप दुई विकेट आउँदा पाकिस्तान खेलमा हाबी हुन सक्थ्यो । नयाँ ब्याटरमा मेलबर्नको पिचमा खेल्न सहज हुँदैन । त्यसैपनि यस विश्वकपकै उत्कृष्ट बलिङ आक्रामण भएको पाकिस्तानविरुद्ध रन जोड्न धेरै मुश्किल पर्दछ ।

पाकिस्तानलाई यस खेल जित्न लगातार विकेट बाहेक अन्य विकल्प थिएन । तर बेन स्टोक्सले परिपक्क प्रदर्शन गरे । स्टोक्सले कमजोर बलको भरपूर्ण फाइदा उठाए । बेन स्टोक्सको विकेट लिन नसक्नु हारको एक कारण हो ।

३.अफ्रिदी घाइते हुनु

पाकिस्तानले सानदार बलिङ गर्दै इंग्ल्यान्डका ब्याटरलाई दबाबमा राखेको थियो । इंग्ल्यान्ड १५ ओभरमा ९७–४ को अवस्थामा थियो । अन्तिम ३० बलमा इंग्ल्यान्डलाई ४१ रन चाहिँएको थियो । अफ्रिदी, रौफ र मोहम्मद वासिम जुनियरको दुई दुई ओभर बाँकी थियो ।

हरियो दुवोको भरपूर्ण फाइदा उठाउँदै तीव्र गतिका बलरले उत्कृष्ट प्रदर्शन गरे । तर अफ्रिदी ह्यारी ब्रुकको १३ औं ओभरको तेस्रो बलमा लङअफमा क्याच लिनेक्रममा घाइते भए । उनको खुट्टामा समस्या देखिएको थियो । लगत्तै मैदान बाहिर गएका उनी पुन बलिङमा फर्किए । पछि १६ औं ओभरमा एक बल फ्याँले पनि त्यसपछि सकेनन् । जुन पाकिस्तानको हारको एक टर्निङ प्वाइन्ट थियो ।

अफ्रिदीको दुई ओभर बाँकी थियो । इंग्ल्यान्ड दबाबमा थियो । एउटा बलरलाई बढी रन हान्नुपर्ने जोखिम लिन नै पर्ने थियो । अफ्रिदीले दुई ओभरमा खेललाई मोड्न सक्थे । एक विकेटले खेलमा परिवर्तन आउन सक्थ्यो । उनी नहुँदा टिमकै मनोबल कमजोर बन्यो ।

उनको स्थानमा आएका इफ्तिखार अहमदलाई पाँचौं बलमा चौका र अन्तिम बलमा छक्का दिएपछि इंग्ल्यान्ड पूर्ण रुपमा हाबी बन्यो । त्यसपछि लगत्तै अर्को ओभरमा मोहम्मद वासिम जुनियरले ३ चौकासहित १६ रन खर्चिए । अफ्रिदी घाइते नभएको भए खेल पाकिस्तानको पक्षमा जान सक्थ्यो ।

२.अत्याधिक डट बल

इंग्ल्यान्ड विश्वको सबैभन्दा विष्फोटक ब्याटर र ब्याटिङमा गहिराई भएको टोली थियो । त्यसैले कम्तिमा प्रतिस्पर्धात्मक लक्ष्य बनाउनु पर्ने थियो । मेलबर्नको बाउन्ड्री ठूलो हुँदा डबल सिंगलमा धेरै ध्यान दिनुपर्ने थियो । कप्तान बाबरले खेलपछि २० रन सर्ट भएको बताएका थिए ।

पाकिस्तानले कमजोर ब्याटिङ गर्नेक्रममा ४८ बल डट खेलेको थियो । ४८ मध्य २५–३० बलमा सिंगलमात्रै जोडेको भए १ सय ७० माथि योगफल बन्थ्यो । मेलबर्नको पिचमा पाकिस्तानका बलरलाई बचाउन त्यो पर्याप्त हुन्थ्यो । इंग्ल्यान्डका ब्याटरलाई स्कोर बोर्डको समेत दबाब हुँदा खराब सट खेल्ने सम्भावना बढ्थ्यो । पाकिस्तानले खेल जित्न सक्थ्यो ।

१.कमजोर अन्त्य

पाकिस्तानको हारको मुख्य कारण कमजोर अन्त्य हो । एक समय पाकिस्तान १५ ओभरमा १०६-४ को अवस्थामा थियो । क्रिजमा शादब खान ८ बलमा १० र शान मसुद २३ बलमा ३४ रन खेलेका थिए । दुबै ब्याटर क्रिजमा थिए ।

मोहम्मद नवाज आउन बाँकी थियो । अफ्रिदी र जुनियरले पनि राम्रो हिटिङ हान्ने गर्दछन् । पाकिस्तानले अन्तिम ३० बलमा ५० रन सजिलै बनाउन सक्थ्यो ।

तर पाकिस्तानले अन्तिम ३० बलमा ३१ रन रन बनाउन ४ विकेट गुमाएको थियो । त्यहिँ कमजोर अन्त्य नै उपाधि जित्न नसक्नुको प्रमुख आधार बन्यो ।