काठमाडौं (हाम्रो खेलकुद) – नेपालले युवा विकेटकिपर अर्जुन साउद र हरिंशकर शाहलाई युएईसँगको पहिलो ओडिआई खेलमा डेब्यू दिएको छ । टियु क्रिकेट मैदानमा नेपालका कप्तान रोहित पौडेलले टस जितेर पहिला फिल्डिङ गर्ने निर्णय लिएका हुन् ।

नेपालले आजको खेलमा अर्जुन साउदलाई ओडिआईमा डेब्यू दिएको छ । अर्जुनले नेपालको लागि टि२० आईमा केन्याविरुद्ध गत अगष्टमा डेब्यू गरेका थिए । अर्जुनले तीन खेल खेल्दा ७० रन बनाएका थिए । केन्याविरुद्ध एकदिवसीय खेल खेलेका थिए । तर त्यो अभ्यास मात्र थियो । त्यसले त्यो खेलको कुनै मान्यता हुँदैन ।

सुदुरपश्चिमबाट घरेलु क्रिकेट खेल्ने उनी यसै वर्षदेखी त्रिभुवन आर्मी क्लबमा गएका छन् । घरेलु र सिनियर टोली दुबैमा राम्रो प्रभाव छाडेपछि डेब्यू पाएका हुन् । उनले विकेटकिपरको रुपमा खेल्नेछन् । नेपालले आज अर्जुन, आसिफ शेख र कुशल भुर्तेल तीनै जनालाई मैदान उतारेको छ ।

अर्जुन विकेटकिपरसँगै आक्रामक ब्याटिङको क्षमता राख्छन् । यता मधेश प्रदेशका बायाँ हाते स्पिन अलराउन्डर हरिशंकर शाहले नेपाली क्रिकेट टोलीमा डेब्यू गरेका छन् । पहिलो पटक नेपाली क्रिकेट टोलीमा परेका हरिशंकरले पहिलो खेलमै डेब्यू पाएका हुन् । उनी ब्याटिङसँगै स्पिन बलिङ गर्ने गर्दछन् ।

त्यस्तै कप्तानमा रोहित कुमार पौडेलले डेब्यू गरेका छन् । नेपालका लागि कप्तानको रुपमा डेब्यू गरेका हुन् । त्यस्तै युएईका कप्तान सिपी रिजवानले ओडिआई खेलमा पहिलो कप्तानी गरेका छन् ।

नेपालले आजको खेलमा मोहम्मद आदिल आलम, सागर ढकाल, भीम सार्की, कमलसिंह ऐरी र आरिफ शेखलाई बेन्चमा राखेको छ ।

नेपालको प्लेइङ ११ :

आसिफ शेख, अर्जुन साउद, कुशल भुर्तेल, ज्ञानेन्द्र मल्ल, दीपेन्द्रसिंह ऐरी, रोहित पौडेल (कप्तान), हरि शंकर, करण केसी, सोमपाल कामी, गुलशन झा र ललित राजवंशी ।