काठमाडौं (हाम्रो खेलकुद) – पार्ट टाइम स्पिनर कुशल भुर्तेलले दोस्रो ओडिआई खेलमा युएईका कप्तान सिपी रिजवानलाई आउट गरेका छन् । टियु क्रिकेटमा मैदानमा टस जितेर पहिला ब्याटिङ रोजेको युएईले २५ ओभरमा ४ विकेट गुमाउँदै १ सय १९ रन बनाएको छ ।

२४ औं ओभरको पहिलो बलमा सिपी रिजवान एक्स्ट्रा कभरमा रोहित पौडेलबाट २२ रनमा क्याच आउट भएका छन् । कुशल भुर्तेलको यो ओडिआई करिअरको पहिलो विकेट हो ।

युएईका ओपनर मोहम्मद वासिम ४६ बलमा ३ चौका र ४ छक्कासहित ५० रनमा आउट भए । ललितले १५ औं ओभरको अन्तिम बलमा वासिमलाई आउट गर्दै ओडिआई करिअरको पहिलो विकेट लिए । टियु एण्डबाट आएका ललितको बलमा वासिम फस्ट स्लिपमा आरिफ शेखबाट क्याच हुन पुगेका थिए ।

पहिलो विकेटका लागि ओपनर मोहम्मद वासिम र वृत्य अरविन्दले ११.५ ओभरमा ७२ रनको साझेदारी गर्दै उत्कृष्ट सुरुवात दिलाए । आक्रामक सुरुवात गरेको युएईलाई चोभार एण्डबाट आएका दीपेन्द्रले आफ्नो पहिलो ओभरमै नेपाललाई सफलता दिलाएका थिए ।

वृत्य दीपेन्द्रको बलमा डीप मिडविकेटमा सोमपाल कामीबाट २५ रनमा क्याच आउट हुन पुगे । उनले ३९ बलमा ४ चौका प्रहार गरे । त्यसपछि भने युएईले लगातार विकेट गुमाउन पुग्यो । सोमपाल कामीले रोहन मुस्तफालाई ४ रनमा बोल्ड आउट गरे ।

युएईले पहिलो पावर प्लेमा कुनै विकेट नगुमाई ७० रन बनाउँदै विष्फोटक सुरुवात गरेको थियो । नेपालले आजको खेलमा हरिशंकर शाहलाई बेन्चमा राख्दै आरिफ शेखलाई मौका दिएको छ । युएईले भने अहमद राजा र जुनैद्द सिद्दिकलाई बेन्चमा राखेको छ । सबीर अली र विष्णु सुकुमारनलाई मौका दिएको छ ।