काठमाडौं (हाम्रो खेलकुद) – नेपालका ओपनर आसिफ शेख र अर्जुन साउद युएईसँगको दोस्रो ओडिआई खेलमा सस्तैमा आउट भएका छन् । जितको लागि १ सय ९२ रनको मध्यम विजयी लक्ष्य पछ्याएको नेपालले ७ ओभरमा २ विकेट गुमाउँदै २५ रन बनाएको छ ।

नेपालका ज्ञानेन्द्र मल्ल २४ बलमा २ चौकासहित १५ रनमा अविजित छन् । रोहित पौडेल ६ बलमा २ रनमा अविजित छन् ।
तीव्र गतिका बलर हजरत बिलालको पहिलो ओभरको चौथो बलमा ओपनर अर्जुन साउद शून्यमा थर्डम्यानमा सबिर अलीबाट क्याच आउट भए ।

बिलालकै पाँचौं ओभरको पाँचौं बलमा आसिफ शेख एज लागेर बासिल हामीदबाट ६ रनमा क्याच आउट भए ।

त्यसअघि टियु क्रिकेटमा मैदानमा टस जितेर पहिला ब्याटिङ रोजेको युएई ४३.२ ओभरमा १ सय ९१ रनमा अल आउट भयो । युएईका ओपनर मोहम्मद वासिम ४६ बलमा ३ चौका र ४ छक्कासहित सर्वाधिक ५० रनमा आउट भए ।

एक समय ७२–० को बलियो सुरुवात गरेको युएई पहिलो विकेटको पतनपछि भने राम्रो साझेदारी गर्न सकेन । आक्रामक सुरुवात गर्दै एक समय विशाल योगफलको सम्भावना देखाएपनि नेपालले उत्कृष्ट पुनरागमनका साथ युएईलाई मध्यम योगफलमै रोकेको हो ।

नेपालका सोमपाल कामीले ७.२ ओभरमा ३५ रन खर्चेर ३ विकेट लिए । ललित राजवंशीले १० ओभरमा ४१ रन खर्चेर ३ विकेट लिए । कुशल भुर्तेल, दीपेन्द्रसिंह ऐरी, गुलशन झा र करण केसीले एक एक विकेट लिए । तीन खेलको सिरिजमा युएईले १९० को अग्रता लिएको छ । नेपाल पहिलो खेलमा ८४ रनले पराजित भएको थियो ।