काठमाडौं (हाम्रो खेलकुद) – दोस्रो ओडिआई खेलमा युएईका युवा ब्याटर एलिशान शराफुले प्रतिबन्ध बलमा थुक लगाएपछि नेपालले पाँच रन पेनाल्टी पाएको छ ।

२२ औं ओभरको दोस्रो बलपछि युएईका फिल्डर एलिशान शराफुले बलमा थुक लगाएका थिए । कोरोना महामारीपछि बलमा थुक लगाउन पाइदैन । बलमा थुक लगाउन पूर्ण रुपमा प्रतिबन्ध हुँदा नेपालले पाँच रन पेनाल्टी पाएको हो ।

युएईका फिल्डरले बलमा थुक लगाएको पाएपछि अम्पायरले केहि समयको छलफलपछि नेपाललाई पाँच रन पेनाल्टी दिएका थिए । त्यसपछि अन्तिम बलमा जहूर खानलाई कुशल भुर्तेलले लगातार तीन चौका हानेका थिए ।

जितको लागि १ सय ९२ रनको विजयी लक्ष्य पछ्याएको नेपालले ३७ ओभरमा ६ विकेट गुमाउँदै १ सय ३१ रन बनाएको छ। नेपालका कुशल भुर्तेल ५२ बलमा ६ चौकासहित सर्वाधिक ३६ रनमा बोल्ड आउट भए । उनी स्पिनर रोहन मुस्तफाको योर्कर बलमा बोल्ड हुन पुगेका थिए ।

तीव्र गतिका बलर हजरत बिलालको पहिलो ओभरको चौथो बलमा ओपनर अर्जुन साउद शून्यमा थर्डम्यानमा सबिर अलीबाट क्याच आउट भए । बिलालकै पाँचौं ओभरको पाँचौं बलमा आसिफ शेख एज लागेर बासिल हामीदबाट ६ रनमा क्याच आउट भए ।

स्पिनर रोहन मुस्तफाको १३ औं ओभरको पाँचौं बलमा रोहित पौडेल ८ रनमा एलबीडब्लू आउट भए । स्वीप सट खेलेका रोहित गल्भ्समा लागेपनि एम्पायरले आउट दिएका थिए ।

ज्ञानेन्द्र मल्ल १८ औं ओभरको तेस्रो बलमा २६ रनमा रन आउट भए । नन स्ट्राइकमा ज्ञानेन्द्र आफैंले रनको लागि कल गरेपनि रोहन मुस्तफाले रन आउट गर्दै पेभेलिएनको बाटो देखाए । मल्लले ५९ बलमा ४ चौका हाने ।

त्यसअघि टियु क्रिकेटमा मैदानमा टस जितेर पहिला ब्याटिङ रोजेको युएई ४३.२ ओभरमा १ सय ९१ रनमा अल आउट भयो । युएईका ओपनर मोहम्मद वासिम ४६ बलमा ३ चौका र ४ छक्कासहित सर्वाधिक ५० रनमा आउट भए ।

एक समय ७२–० को बलियो सुरुवात गरेको युएई पहिलो विकेटको पतनपछि भने राम्रो साझेदारी गर्न सकेन । आक्रामक सुरुवात गर्दै एक समय विशाल योगफलको सम्भावना देखाएपनि नेपालले उत्कृष्ट पुनरागमनका साथ युएईलाई मध्यम योगफलमै रोकेको हो ।

नेपालका सोमपाल कामीले ७.२ ओभरमा ३५ रन खर्चेर ३ विकेट लिए । ललित राजवंशीले १० ओभरमा ४१ रन खर्चेर ३ विकेट लिए । कुशल भुर्तेल, दीपेन्द्रसिंह ऐरी, गुलशन झा र करण केसीले एक एक विकेट लिए । तीन खेलको सिरिजमा युएईले १-० को अग्रता लिएको छ । नेपाल पहिलो खेलमा ८४ रनले पराजित भएको थियो ।