काठमाडौं (हाम्रो खेलकुद) – खराब ब्याटिङ सुरुवात गरेपनि युवा ब्याटर गुलशन झा र आरिफ शेखले सातौं विकेटका लागि उत्कृष्ट साझेदारी गरेपछि नेपालले दोस्रो ओडिआई युएईलाई तीन विकेटले हराएको छ । योसँगै तीन ओडिआई खेलको सिरिज १-१ को बराबरी अवस्थामा पुगेको छ ।

जितको लागि १ सय ९२ रनको विजयी लक्ष्य पछ्याएको नेपालले ४७.५ ओभरमा ७ विकेट गुमाउँदै पूरा गर्यो । नेपालको जितमा आरिफ शेख ५८ बलमा ३ चौकासहित ३३ रनमा अविजित रहे । सोमपाल कामी १६ बलमा २ चौकासहित १६ रनमा अविजित रहे । सोमपालले लङअनमा चौका हान्दै खेल सकाएका थिए ।

गुलशन झा ४९ बलमा ४ चौका र १ छक्कासहित ३७ रनमा आउट भए । गुलशनको यो ओडिआई करिअरको उच्च प्रदर्शन हो । एक समय २९.१ ओभरमा १०६–६ को अवस्थामा पुगेको नेपाललाई सातौं विकेटका लागी गुलशन झा र आरिफ शेखले ६२ रनको महत्वपूर्ण साझेदारी गर्दै जितको आधार तय गरेका थिए ।

कुशल भुर्तेल ५२ बलमा ६ चौकासहित ३६ रनमा बोल्ड आउट भए । कुशल स्पिनर रोहन मुस्तफाको योर्कर बल रिड गर्न चुक्दा बोल्ड हुन पुगेका थिए । तीव्र गतिका बलर हजरत बिलालको पहिलो ओभरको चौथो बलमा ओपनर अर्जुन साउद थर्डम्यानमा सबिर अलीबाट शून्यमा क्याच हुन पुगे ।

बिलालकै पाँचौं ओभरको पाँचौं बलमा आसिफ शेख ठूलो सटको चक्करमा एज लागेर बासिल हामीदबाट ६ रनमा क्याच भए । स्पिनर रोहन मुस्तफाले १३ औं ओभरको पाँचौं बलमा कप्तान रोहित पौडेललाई ८ रनमा एलबीडब्लू आउट गरे । स्वीप सट खेलेका रोहित गल्भ्समा लागेपनि एम्पायरले आउट दिएका थिए ।

ज्ञानेन्द्र मल्ल १८ औं ओभरको तेस्रो बलमा २६ रनमा रन आउट भए । नन स्ट्राइकमा ज्ञानेन्द्र आफैंले रनको लागि कल गरेपनि मुस्तफाले रन आउट गर्दै पेभेलिएन फर्काए । मल्लले ५९ बल खेल्दै ४ चौका हाने । दीपेन्द्रसिंह ऐरी स्पिनर बासिल हामिदको बलमा १३ रनमा बोल्ड आउट भए ।

२२ औं ओभरको दोस्रो बलपछि युएईका फिल्डर एलिशान शराफुले बलमा थुक लगाएपछि नेपालले पाँच रन पेनाल्टीमा पाएको थियो । कोरोनापछि बलमा थुक लगाउन प्रतिबन्ध लगाइएको छ । त्यसको फाइदा नेपालले पेनाल्टीमा पाँच रन पाएको थियो ।

गुलशन रोहन मुश्तफाको ४५ औं ओभरको दोस्रो बलमा लङअफमा एलिशान शराफुबाट क्याच हुँदै पेभेलिएन फर्केका थिए । युएईका स्पिनर रोहन मुस्तफाले १० ओभरमा २४ रन खर्चेर ३ विकेट लिए । हजरत बिलालले दुई र बासिल हामिदले एक विकेट लिए ।

त्यसअघि टियु क्रिकेटमा मैदानमा टस जितेर पहिला ब्याटिङ रोजेको युएई ४३.२ ओभरमा १ सय ९१ रनमा अल आउट भएको थियो । युएईका ओपनर मोहम्मद वासिम ४६ बलमा ३ चौका र ४ छक्कासहित सर्वाधिक ५० रनमा आउट भए ।

एक समय ७२–० को बलियो सुरुवात गरेको युएई पहिलो विकेटको पतनपछि राम्रो योगफलमा पुग्न सकेन । आक्रामक सुरुवात गर्दै एक समय विशाल योगफलको सम्भावना देखाएपनि नेपालले उत्कृष्ट पुनरागमनका साथ युएईलाई मध्यम योगफलमै रोक्न सफल भएको थियो ।

पहिलो विकेटका लागि ओपनर मोहम्मद वासिम र वृत्य अरविन्दले ११.५ ओभरमा ७२ रनको साझेदारी गर्दै सानदार सुरुवात दिलाए । उक्त सुरुवातलाई चोभार एण्डबाट आएका दीपेन्द्रसिंह ऐरीले तोडेका थिए ।

दीपेन्द्रको बलमा वृत्य डीप मिडविकेटमा सोमपाल कामीबाट २५ रनमा क्याच आउट हुन पुगे । उनले ३९ बलमा ४ चौका प्रहार गरे । त्यसपछि भने युएईले लगातार विकेट गुमाउन पुग्यो ।

स्पिनर ललित राजवंशीको १५ औं ओभरको अन्तिम बलमा वासिमलाई आउट गर्दै ओडिआई करिअरको पहिलो विकेट लिए । टियु एण्डबाट आएका ललितको बलमा वासिम फस्ट स्लिपमा आरिफ शेखबाट समातिन पुगे ।

सोमपाल कामीले रोहन मुस्तफालाई ४ रनमा बोल्ड आउट गरे । सोमपाल कामीले रोहन मुस्तफालाई ४ रनमा बोल्ड आउट गरे । लेग स्पिनर कुशल भुर्तेलको २४ औं ओभरको पहिलो बलमा कप्तान सिपी रिजवान एक्स्ट्रा कभरमा रोहित पौडेलबाट २२ रनमा क्याच आउट भए ।

कुशल भुर्तेलको यो ओडिआई करिअरको पहिलो विकेट हो । ड्रिङ्स ब्रेकपछिको पहिलो बलमै करण केसीले विष्णु सुकुमारन विकेटकिपर आसिफ शेखबाट १५ रनमा क्याच आउट भए ।

उनले ३९ बलमा १ चौका हाने । गुलशन झाको बलमा एलिशान शराफु प्वाइन्टमा दीपेन्द्रसिंह ऐरीबाट ३५ रनमा क्याच आउट भए । शराफुले ४३ बलमा ३ चौका हाने । बासिल हामिद २६ बलमा १ चौका र २ छक्कासहित २४ रनमा सोमपालको बलमा बोल्ड भए । आयन खान २, जहुर खान शून्य, सबिर अली ७ रनमा आउट भए ।

नेपालका सोमपाल कामीले ७.२ ओभरमा ३५ रन खर्चेर ३ विकेट लिए । ललित राजवंशीले १० ओभरमा ४१ रन खर्चेर ३ विकेट लिए । कुशल भुर्तेल, दीपेन्द्रसिंह ऐरी, गुलशन झा र करण केसीले एक एक विकेट लिए ।

नेपाल पहिलो खेलमा ८४ रनले पराजित भएको थियो । तेस्रो तथा निर्णायक खेल शुक्रबार हुनेछ ।