एजेन्सी– अष्ट्रेलियाले पहिलो ओडिआई खेलमा इंग्ल्यान्डमाथि ६ विकेटको सानदार जित हात पारेको छ । योसँगै तीन ओडिआई खेलको सिरिजमा १–० को अग्रता लिएको छ ।

जितको लागि २ सय ८८ रनको विजयी लक्ष्य पछ्याएको अष्ट्रेलियाले ४६.५ ओभरमा ४ विकेट गुमाउँदै पूरा गर्यो । अष्ट्रेलियाको जितमा स्टिभ स्मिथ ७८ बलमा ९ चौका र १ छक्कासहित ८० रनमा अविजित रहे ।

ओपनर डेविड वार्नर र ट्रविस हेडले १९.४ ओभरमा १ सय ४७ रनको साझेदारी गर्दै सानदार सुरुवात दिलाएका थिए । वार्नर ८४ बलमा १० चौका र १ छक्कासहित ८६ रनमा आउट भए । वार्नर डेविड विल्लीको बलमा साम बिलिंग्सबाट आउट भए ।

हेड ५७ बलमा १० चौका र १ छक्कासहित ६९ रन, मार्नस लाबुसेन ४ र एलेक्स केरी २१ रनमा आउट भए । क्यामरन ग्रीन २० रनमा अविजित रहे । इंग्ल्यान्डका डेविड विल्लीले दुई, क्रिस जोर्डन र लियाम डावसनले एक एक विकेट लिए ।

एडिलेड ओभलमा टस हारेर पहिला ब्याटिङ थालेको इंग्ल्यान्डले निर्धारित ५० ओभरमा ९ विकेट गुमाउँदै २ सय ८७ रन बनायो । इंग्ल्यान्डका डेविड मलानले १ सय २८ बलमा १२ चौका र ४ छक्कासहित १ सय ३४ रनको सानदार शतकीय इनिङ खेले ।

हारको बाबजुद सानदार शतकीय इनिङ खेलेका इंग्ल्यान्डका डेविड मलान खेलको प्लेयर अफ द म्याच चुनिए । मलान बाहेक अन्य ब्याटरको प्रदर्शन भने राम्रो हुन सकेन । ओपनर जेसन रोय ६ र फिलिप साल्ट १४ रनमा आउट भए ।

जेम्स भिन्स ५, साम बिलिंग्स १७, जस बटलर २९ र क्रिस जोर्डन १४ रनमा आउट भए । डेविड विल्ली ४० बलमा ३ चौकासहित ३४ रनमा अविजित रहे ।

अष्ट्रेलियाका कप्तान प्याट कमिन्सले १० ओभरमा ६२ रन खर्चेर ३ विकेट लिए । एडम जाम्पाले १० ओभरमा ५५ रन खर्चेर ३ विकेट लिए । मिचेल स्टार्क र मार्कस स्टोइनिसले एक एक विकेट लिए । दोस्रो खेल शनिबार र तेस्रो खेल मंगलबार हुनेछ ।