काठमाडौं (हाम्रो खेलकुद) – नेपालले तेस्रो ओडिआई खेलमा युएईविरुद्ध उत्कृष्ट बलिङ गरेको छ । टियु क्रिकेट मैदानमा टस हारेर पहिला ब्याटिङको निम्तो पाएको युएईले २७ ओभरमा ५ विकेट ८८ रन बनाएको छ ।

बासिल हामिद ४ र विष्णु सुकुमारन २ रनमा क्रिजमा छन् । तीव्र गतिका बलर गुलशन झाले दोस्रो ओभरको दोस्रो बलमा ओपनर मोहम्मद वासिमलाई आसिफ शेखबाट ११ रनमा क्याच गराए ।

चोभार एण्डबाट आएका गुलशनको बलमा एज लागेर आउट हुनुअघि उनले ८ बलमा १ चौका र १ छक्का हाने । त्यसअघिको बलमा वासिमले गुलशनलाई छक्का हान्दै सुरुवात गरेका थिए ।

टियु एण्डबाट आएका सोमपाल कामीले अर्का ओपनर वृत्य अरविन्दलाई शून्यमा बोल्ड गरे । सोमपालको इन स्वींग बल युएईका ओपनर वृत्य बोल्ड हुन पुगेका थिए । गुलशन झाले चौथो ओभरको पहिलो बलमै कप्तान सिपी रिजवानलाई ४ रनमा आसिफ शेखबाट क्याच गराउँदै १६–३ को अवस्थामा पुर्याए ।

त्यसपछि चौथो विकेटका लागि अलिशान शराफु र रोहन मुस्तफाले ६३ रनको साझेदारी गर्दै इनिङ उकासेका थिए । मुस्तफा दीपेन्द्रसिंह ऐरी बलमा २४ रनमा कुशल भुर्तेलबाट क्याच आउट भए । मुस्तफाले ५६ बलमा २ चौका प्रहार गरे ।

शराफुलाई लेग स्पिनर कुशल भुर्तेलले ३३ रनमा बोल्ड गरे । भुर्तेलको बलमा ठूलो सट खेल्न खोजेपनि मिस हुँदा बोल्ड भएका थिए । शराफुले ६९ बलमा ४ चौका प्रहार गरे ।

नेपालले आजको खेलमा एक परिवर्तन गरेको छ । करण केसीलाई बेन्चमा राख्दा हरिशंकर शाहलाई मौका दिएको छ । नेपाल पहिलो खेलमा ८४ रनले पराजित हुँदा दोस्रो खेलमा तीन विकेटले विजयी भएको थियो । तीन ओडिआई खेलको सिरिज १–१ को बराबरी अवस्थामा छ ।