काठमाडौं (हाम्रो खेलकुद) – नेपाली राष्ट्रिय क्रिकेट टोलीले आइसिसी विश्वकप लिग–२ त्रिकोणात्मक ओडिआई सिरिजमा नामिबिया भ्रमण अघि भारतमा दुई अभ्यास खेल खेल्ने भएको छ । नेपाली क्रिकेट टोली आज साँझनै ५ बजे भारत प्रस्थान गर्दैछ । नेपाल क्रिकेट संघ (क्यान) ले दिल्ली जाने नेपाली टोलीलाई मंगलबार बिदाई गरेको छ ।

नेपालले भारतको दिल्ली क्रिक्रेट टोलीसँग खेल्ने क्यानले जनाएको छ । क्यानका अनुसार नेपाल झण्डै एक साता दिल्लीमा नेपाली टोलीले अभ्यास गर्नेछ । नेपाली टोलीले दिल्ली क्रिकेट टोलीसँग बिहीबार र शनिबार दुई एकदिवसिय अभ्यास खेल खेल्ने जनाएको छ ।

क्यानका कार्यवाहक सचिव प्रशान्त विक्रम मल्लका अनुसार नेपालले दिल्ली ११ सँग खेल्नेछ । दिल्लीको मुख्य टोली विजय हजारे र रणजी ट्रफीमा ब्यस्त हुँदा दोस्रो स्तरको टोलीसँग खेल्ने जनाए । जहाँ स्तरिय खेलाडी खेल्ने प्रशान्तले दाबी गरे । नेपाली टोली आइतबार राती नामिबिया प्रस्थान गर्नेछ ।

नेपाल, नामिबिया र स्कटल्यान्डबीच प्रतिस्पर्धा हुनेछ । नेपालले पहिलो खेल मंसिर १६ (डिसेम्बर २) मा घरेलु टोली नामिबियासँग खेल्नेछ । मंसिर १८ (डिसेम्बर४ मा) स्कटल्यान्डसँग खेल्नेछ । नेपालले मंसिर २१ मा (डिसेम्बर ७) नामिबिया र मंसिर २२ मा (डिसेम्बर ८) स्कटल्यान्डसँग खेल्नेछ ।

विश्वकप लिग-२ अंक तालिका

अमेरिका ३३ खेलमा १४ मा जित र १६ मा हारका साथ ३१ अंक जोड्दै तेस्रो स्थानमा छ । अमेरिकाले अव तीन खेल खेल्न बाँकी छ । नामिबिया २४ खेलमा १४ मा जित र १० मा हारका साथ २८ अंक जोड्दै चौथो स्थानमा छ । नेपाल भने २० खेलमा ८ मा जित र ११ मा हारका साथ १७ अंक जोड्दै छैटौं स्थानमा छ ।

अमेरिकाको हारले नेपाललाई फाइदा हुनेछ । जितले भने घाटा किनभने सोझै ओडिआई मान्यता पाउन शीर्ष पाँचमा पर्नुपर्छ । शीर्ष तीनमा रहँदै सोझै ग्लोबल छनोट खेल्न पनि अमेरिकाले बाँकी खेल हार्दा सहज हुनेछ ।

नेपालले अमेरिका र पपुवा न्युगिनीलाई पछि पार्न अन्य टोलीलाई भन्दा सहज छ । पपुवा न्युगिनी २५ खेलमा २ मा जित र २२ मा हारका साथ ५ अंक जोड्दै पुछारमा छ । पपुवा न्युगिनीले बाँकी ११ खेल जितेमा मात्रै २७ अंक हुनेछ।

अमेरिका बाँकी तीन खेल जित्दा ३७ अंक हुनेछ । नेपालको १७ अंक छ । जसले नेपालले धेरै भन्दा धेरै खेल जित्नु पर्ने हुन्छ । अमेरिकाले बाँकी सबै खेल हार्दा पनि उसलाई पछि पार्न नेपालले कम्तिमा ८ खेल जित्नुपर्ने हुन्छ । त्यसैले अमेरिका जित नेपाललाई ठूलो घाटा बन्ने समिकरण छ ।

ओमान ३६ खेलमा २१ मा जितका साथ ४४ अंकका साथ शीर्षस्थानमा छ । ओमानलाई पछि पार्न नेपालले बाँकी १६ मध्य १४ खेल जित्नुपर्ने हुन्छ । अन्य टोलीले भने पुरै खेल सकाएका छैनन् । स्कटल्यान्ड २८ खेलमा १९ मा जितका साथ ४० अंक जोड्दै दोस्रो स्थानमा छ । युएई २६ खेलमा १२ मा जितका साथ २७ अंकका साथ पाँचौं स्थानमा छ । युएईको हारले नेपाललाई फाइदा पुग्नेछ ।

त्यसपछि नेपालले नामिबिया र स्कटल्यान्डसँग टियुमा त्रिकोणात्मक सिरिज खेल्नेछ । पपुवा न्युगिनीमा युएईसँग त्रिकोणात्मक सिरिज खेल्नेछ । पपुवा न्युगिनी, युएई र नेपालबीच टियुमा सिरिज हुनेछ ।

नेपालको टोली :

रोहित पौडेल (कप्तान), आसिफ शेख, दीपेन्द्रसिंह ऐरी, कुशल भुर्तेल, ललित राजवंशी, सोमपाल कामी, सागर ढकाल, अर्जुन साउद, ज्ञानेन्द्र मल्ल, आरिफ शेख, गुलशन झा, करण केसी, हरिशंकर शाह र नन्दन यादव ।