काठमाडौं(हाम्रो खेलकुद) – युवा ब्याटर देव खनाल नेपाली क्रिकेट टोलीमा नपर्नुमा नेपाल क्रिकेट संघ (क्यान) ले बलात्कार आरोप लागेका क्रिकेटर सन्दीप लामिछानेको घटनासँग कुनै सरोकार नभएको प्रष्ट पारेको छ ।

नेपाली क्रिकेट र घरेलु क्रिकेटमा राम्रो प्रदर्शनका बाबजुद देव युएईसँग घरेलु मैदान टियुमा यसै साता सम्पन्न तीन ओडिआई खेलको सिरिज र नामिबिया भ्रमणको लागि टोलीमा पर्न सकेनन् । देव टोलीमा नपरेपछि चर्को आलोचना पनि हुँदै आएको छ ।
क्यानका कार्यवाहक सचिव प्रशान्त विक्रम मल्लले प्रदर्शनको कारण देव नपरेको बताए ।

‘देव टोलीमा नपर्नुमा प्रदर्शनको कारण नै । देव खेल्ने फष्ट डाउन (तेस्रो नम्बर) मा हो । उस्को र ज्ञानेन्द्र मल्ल त्यो स्थानमा हो । त्यो स्थानमा ज्ञानुको प्रदर्शन भयो र देवको भएन । सायद प्रशिक्षकलाई ज्ञानुमाथि विश्वास भयो’, प्रशान्तले भने ।

अर्कोतर्फ १४ खेलाडीको कारण नपरेको बताए । ‘टिम त १४ नै हो । यो हाल्देउ, तीन विकेटकिपर राखौं । लेग स्पिनर दुई चार वटा भन्ने हुदैन । क्रिकेटमा यो पर्यो त्यो परेन होईन । हिजो देव आवश्यक थियो । ज्ञानेन्द्र लय बाहिर थिए । ज्ञानेन्द्रले पूनरागमन गर्यो । नयाँ प्रशिक्षकले मौका दियो र त्यहाँ पनि ५० हान्यो । अहिले पनि राम्रो खेल्यो’, उनले भने ।

ज्ञानेन्द्रले केन्यासँग पाँचौं टि२० आई खेलमा ५९ रन हानेका थिए । गत शुक्रबार युएईसँग तेस्रो ओडिआई खेलमा ६४ रनको इनिङ खेलेका थिए ।

देव टोलीमा नपर्नुमा बलात्कार आरोप लागेका सन्दीप लामिछानेसँगको घटनासँग जोडिएर पनि हेर्ने गरिएको छ । त्यो घटनासँग देव टोलीमा नपर्नुमा कुनै सरोकार नभएको प्रशान्तले प्रष्ट पारे ।

‘उ टोलीमा नपर्नुमा सन्दीपसँग घटना कुनै सरोकार छैन । त्यो भएको भए त प्रदेशबाट पनि हटाइदिन भन्थ्यौं । देव टोलीमा नपर्नुमा पोजिसन नै हो । प्रशिक्षकले ज्ञानेन्द्रमाथि विश्वास गर्यो’, मल्लले भने ।

देव लुम्बिनी प्रदेशबाट कप्तानी गर्दै प्रधानमन्त्री कप एकदिवसीय राष्ट्रिय प्रतियोगितामा ४ खेलमा ३ मा अर्धशतकसहित २ सय ४९ रनका साथ सर्वाधिक रन बनाउने ब्याटरमा तेस्रो नम्बरमा थिए । देवले २०२२ मार्चमा पपुवा न्युगिनीविरुद्ध टियु क्रिकेट मैदानमा डेब्यू गरेका थिए ।

नेपालबाट १० ओडिआई खेल खेलेका देवले २ अर्धशतकसहित कुल २ सय ५३ रन बनाएका छन् । देव पछिल्लो पटक केन्या भ्रमणमा गत सेप्टेम्बरमा एकदिवसिय अभ्यास खेल खेलेका थिए ।

त्यसपछि सन्दीप लामिछानेलाई बालिका बलात्कार आरोप लागेको थियो । त्यो घटनाको पीडित युवतीलाई देवले सन्दीपसँग चिनजान गराएको आरोप लाग्दै आएको थियो । त्यसैको कारण उनी टोलीमा नपरेको हुन सक्ने धेरैले आशंका गरेका थिए ।

देव बुधबारबाट काठमाडौंमा सुरु हुने यू-१९ राष्ट्रिय प्रतियोगितामा लुम्बिनी प्रदेशबाट खेल्नेछन् । गतवर्ष लुम्बिनीलाई यू-१९ राष्ट्रिय च्याम्पियन बनाएपनि यस पटक कप्तानी भूमिकामा छैनन् । लुम्बिनीको कप्तानी विशाल विक्रम केसीले गर्नेछन् ।