काठमाडौं (हाम्रो खेलकुद) – घरेलु टोली प्रदेश एकले सगरमाथा कप टि२० प्रतियोगिता उद्धघाटन खेलमा विभागीय टोली नेपाल पुलिस क्लबमाथि ७ विकेटको सानदार जित हात पारेको छ ।

जितको लागि ६७ रनको विजयी लक्ष्य पछ्याएको प्रदेशले एकले ८.३ ओभरमा ३ विकेट गुमाउँदै पूरा गर्यो । प्रदेश एकका कप्तान सिद्धान्त लोहनी १८ बलमा ३ चौका र १ छक्कासहित २५ रनमा अविजित रहे ।

अंकित सुवेदीले १४ बलमा २ चौका र २ छक्कासहित सर्वाधिक २६ रन बनाउँदै रन आउट भए । विधान गोस्वामी ३, निरज मुखिया ७ र श्रवण यादवले ४ रन बनाए ।पुलिसका राशिद खान र योगेन्द्रसिंह कार्कीले एक एक विकेट लिए ।

त्यसअघि बिराटनगरमा रहेको बैजनाथपुर क्रिकेट ग्राउन्डमा टस हारेर पहिला ब्याटिङ थालेको नेपाल पुलिस क्लबले निर्धारित ९ ओभरमा ६ विकेट गुमाउँदै ६६ रन बनायो । पिच गिलो (खेल्न नमिल्ने) भएपछि ढिलो सुरु हुँदा खेल ९ ओभरमा झारिएको थियो ।

पुलिसका सुनिल धमला ८, शंकर राना शून्य, अमित श्रेष्ठ ११, पवन सरार्फ २, दीलिप नाथ १४ रनमा आउट भए । राशिद खान १४ र योगेन्द्रसिंह कार्कीले ७ रन बनाए ।

प्रदेश एकका सोनु मण्डलले २ ओभरमा ६ रन खर्चेर २ विकेट लिदै प्लेयर अफ द म्याच चुनिए । फिर्दोस अन्सारीले २ ओभरमा १२ रन खर्चेर २ विकेट लिए । कमल खत्रीले एक विकेट लिए ।

प्रदेश एकले आयोजना गरेको सगरमाथा कपमा तीन विभागी टोली, भारतका दुई टोली इस्ट सेन्ट्रल रेलवे र ध्रुब क्रिकेट एकेडेमी गरि कुल ६ टोली छन् ।