काठमाडौं (हाम्रो खेलकुद) – युवा ब्याटर सुमित महर्जनले उत्कृष्ट ब्याटिङ गरेपछि नेपाल एपिएफ क्लबले सगरमाथा कप टि२० क्रिकेट प्रतियोगितामा त्रिभुवन आर्मी क्लबलाई दुई विकेटले पराजित गरेको छ ।

जितको लागि १ सय ३९ रनको विजयी लक्ष्य पछ्याएको एपिएफले १९.३ ओभरमा ८ विकेट गुमाउँदै पूरा गर्यो । एपिएफको जितमा सुमित महर्जन १५ बलमा ४ छक्कासहित ३७ रनमा अविजित रहे । एक समय एपिएफ १६ ओभरमा ९३-८ को अवस्थामा थियो । हार तर्फ अघि बढेको एपिएफलाई जिताउन सुमितले त्यसपछि सानदार प्रदर्शन गरेका थिए । १९ औं ओभरमा हरि चौहानलाई दुई छक्कासहित १६ रन बनाएपछि जित सहज बनेको थियो ।

ओपनर प्रदीप ऐरी १०, आयुषमान बम १३, लोकेश बम १६ र सन्दीप जोरा ११ रनमा आउट भए । पुरन विक १४ बलमा १ चौका र २ छक्कासहित २१ रनमा आउट भए ।

आर्मीका हरि चौहानले ३ ओभरमा २४ रन खर्चेर ४ विकेट लिए । बसिर अहमदले दुई, सुशन भारी र विक्रम सोबले एक एक विकेट लिए ।

त्यसअघि विराटनगरको बैजनाथपुरमा टस जितेर पहिला ब्याटिङ थालेको आर्मीले निर्धारित २० ओभरमा ४ विकेट गुमाउँदै १ सय ३८ रन बनायो । आर्मीका कुशल मल्लले ३२ बलमा १ चौका र ४ छक्कासहित सर्वाधिक ४९ रनमा अविजित रहे ।

सचिन शर्मा ३३ बलमा ३ चौकासहित ३०, हरि चौहान ११ र भीम सार्कीले १३ रन बनाए । विक्रम सोबले २० बलमा १ चौका र १ छक्कासहित २० र विनोद भण्डारीले ८ रन बनाए । नेपाल एपिएफ क्लबका कमलसिंह ऐरीले ४ ओभरमा २६ रन खर्चेर २ विकेट लिए । विपिन खत्रीले ४ ओभरमा १८ रन खर्चेर १ विकेट लिए ।

प्रदेश एकले आयोजना गरेको सगरमाथा कपमा तीन विभागी टोली, भारतका दुई टोली इस्ट सेन्ट्रल रेलवे र ध्रुब क्रिकेट एकेडेमी गरि कुल ६ टोली छन् ।